Vitia thotë se nuk do të përgjigjet në pyetjet e deputetëve pa u votuar marrëveshjet ndërkombëtare, reagon opozita

Kuvendi i Kosovës ka filluar seancën plenare, me rend dite pyetjet parlamentare.

Ndërkaq, ministri i Shëndetësisë, Arben Vitia ka thënë se nuk do të përgjigjet në pyetjet e deputetëve të ardhura nga partitë opozitare pasi ata nuk janë duke i votuar marrëveshjet ndërkombëtare.

“Deri sa të votohen marrëveshjet ndërkombëtare nuk do të përgjigjem në pyetjet që i bëni, sidomos nga deputetë të cilët nuk i votojnë këto marrëveshje”, ka thënë Vitia.

I menjëhershëm ishte reagimi i deputetëve opozitarë.

Deputetja, Time Kadrijaj nga AAK i reagoi duke thënë se më kërcënime të tilla nuk mund të shantazhohen.

Edhe deputetja nga radhët e PDK-së, Ganimete Musliu reagoi duke thënë “se të tilla kushte nga Qeveria e Kosovës janë diktaturë”.

“Ma ardh qeveria me na qit kushte në parlament kjo është diktaturë, por s’do të lejojmë diktatura të tilla”, tha Musliu.

Ajo tha se pyetjen që e ka për ministrin e Punëve të Brendshme, Xhelal Sfeçlën nuk do ta bëj, por ka një kërkesë për të.

“Pyetjen s’po e bëj për Xhelal Sveçlën, por po i them merre kabinetin tënd nga Belvedere dhe sille në Prishtinë. Lej të lirë policët të punojnë”, kërkoi Musliu. /Telegrafi/