Ç(kapja) e bordeve të ndërmarrjeve publike, PDK: Qeveria Kurti bëri stërkapjen e tyre

Koordinatori i Departamentit për Financa në Kabinetin për Qeverisje të Mirë në Partinë Demokratike të Kosovës, Arben Mustafa është shprehur se partia në pushtet po bënë stërkapjen e bordeve të ndërmarrjeve publike.

Mustafa në një intervistë për Telegrafin, ka theksuar se po bëhet një kapje e paparë e shtetit.

“Nëse më parë i kanë thënë kapje, tani ka stërkapje. Kapja që ndodh tani është për të ardhur keq se si zëvendëskryeministri [Besnik] Bislimi e thotë se ne jemi me fat që kemi ekspertë. Në të kaluarën kur partitë i kanë punësuar eksponentët e vet kanë thënë që janë ekspertë, mirëpo këta po krenohen në atë kohë”, ka theksuar Mustafa.

Ai shton se kapja e këtyre institucioneve po bëhet me një krenari dhe nuk po ndihet nevoja për të dhënë llogari.

“Nëse i shohim institucionet publike, kemi një kapje të plotë, por kjo bëhet pa e ndier nevojën për të dhënë llogari, të paktën. Këta po e bëjnë në masë shumë më të theksuar se çfarë ka ndodhur më parë dhe me një krenari që ne kemi njerëz. E vërteta është se nuk kanë njerëz profesionistë, por se ekziston një kapje e paparë e shtetit. Kjo është shqetësuese për këtë vend”, shton ai.

Lexo po ashtu “Propagandë se ka zhvillim ekonomik” – gjithçka nga intervista me ekonomistin e PDK-së, Arben Mustafa  

“Ministri në hije” i Financave nga PDK përfundon se partia në pushtet po e keqpërdor besimin që qytetarët i kanë dhënë për të qeverisur.

“Kemi një parti që ka ardhur në pushtet në emër të ndryshimit. 51 për qind e votuesve ia kanë dhënë besimin për ndryshim, mirëpo ajo se çfarë ka ndodhur është një tradhti ndaj çdo votuesi që ka pritur ndryshim”, përfundon Mustafa.

Në këtë intervistë, Mustafa gjithashtu ka folur edhe për atë siç e ka quajtur ai, propagandën që po e bën Qeveria e Kosovë lidhur me zhvillimin ekonomik të vendit, mungesën e investimeve kapitale, sektorin privat dhe çështjen e punësimit. /Telegrafi/