Videoadresimet e LVV-së kundër opozitës, Gjoshi: Tendencë për ta mbuluar paaftësinë për qeverisje

Brenda një jave, Lëvizja Vetëvendosje publikoi në llogarinë zyrtare në Facebook dy video të shkurta, ku kritikohen partitë të cilat kanë udhëhequr në Kosovë në të kaluarën, ndërsa liderët e tyre cilësohen si shkatërrues të shtetit. Në njërën nga videot shfaqen edhe dy themeluesit e Partisë Demokratike të Kosovës, Hashim Thaçi e Kadri Veseli, të cilët tani ndodhen në Hagë.

Video të tilla për PDK-në nuk janë aspak pengesë, por vetëm tendencë e Lëvizjes Vetëvendosje për ta mbuluar paaftësinë për qeverisje.

Kështu deklaroi të martën sekretari organizativ dhe zgjedhor në PDK, Betim Gjoshi, i ftuar në emisionin “Përballje” në Telegrafi.com me kryeredaktorin Muhamet Hajrullahu.

“Video të tilla neve si PDK aspak s’na kanë penguar. Vetëm edhe njëherë e kanë bërë më lakuriq këtë qeveri para qytetarëve se sa e pazotë dhe e paaftë është. E ka të kotë që me mjete të tilla propagandistike që më shumë i shkojnë një partie opozitare minore, që të tentojë ta fshehë paaftësinë dhe moszgjidhjen e problemeve kryesore që kanë sot qytetarët e vendit si energjia elektrike, gjërat ushqimore, nafta e shumë probleme tjera”, u shpreh Gjoshi.

Sipas tij, gjithçka e mirë në Kosovë – që nga liria e deri te ndërtimi i institucioneve – lidhet me emrin dhe drejtuesit e PDK-së.

“Sipas kësaj logjike të thjeshtë, i bie që Millosheviqi e ka ndreq këtë vend e ne e kemi shkatërruar që 20 vjet. Shkatërrim është kur diçka e mirë prishet. Ne nuk kemi qeverisur 20 vjet e as nuk kemi për detyrë që të arsyetojmë punën e UNMIK-ut e EULEX-it. Por, gjithçka që është e mirë në këtë vend, që nga liria deri te ndërtimi i institucioneve, lidhet me emrin dhe drejtuesit e PDK-së”.

Mes tjerash, ai tha se për herë të parë në historinë e Kosovës kryeministri menaxhon gjithë shtetin dhe sërish nuk po arrin të zgjidhë asnjë hall të qytetarëve.

“Për herë të parë në historinë e Kosovës që 20 vjet një njeri e udhëheq krejt shtetin. Një person është kryeministër, ministër i Shëndetësisë, i Drejtësisë, i Ekonomisë, kryetar i Kuvendit, president i vendit, Kryeprokuror, drejtor i KEK-ut, drejtor i Postës etj. Pra, populli ja ka dhënë krejt këtë pushtet për me ndreq këtë vend. Sot kemi një kryeministër që menaxhon të gjitha gjërat dhe nuk e zgjidh asnjë hall. Do të mbahet mend vetëm për humbje të kohës 3-4 vjeçare për qytetarët e Kosovës”.

Gjoshi mes tjerash foli edhe për opozitarizmin e PDK-së, duke thënë se këtë e kanë bërë çdo herë duke përdorur mjetet demokratike.

“Të gjitha temat që janë ngritur në vend janë ngritur nga ne. PDK-ja është parti opozitare më normale dhe e bën opozitarimin me mjete që i lejon demokracia. Mos e prisni PDK-në me mjete jodemokratike të bëjë protesta. Mos e prisni PDK-në që të shkojë të ua tmerrojë gratë e fëmijët siç kanë bërë ata. Ne më shumë e duam Kosovën se partinë. E vetmja parti jemi që asnjëherë nuk kemi linçuar dikë dhe nuk kemi përjashtuar askënd nga partneriteti”.

“Ne çdo ditë jemi në terren dhe i dëgjojmë hallet e qytetarëve. Nuk ka asnjë që jeton më mirë dhe që është më i kënaqur sot se para 3 vjetëve, përveç atyre 100-200 vetave që janë afër Albin Kurtit me xhipa e vetura të shtrenjta. Rreth 200 mijë vetë e kanë lëshuar vendin në tri vjetët e fundit. Albin Kurti është i shkëputur nga realiteti. Ne po i themi ofro zgjidhje për problemet me të cilat po ballafaqohen njerëzit”.

Në fund, ai tha se nëse kjo qeveri nuk i kthen sytë nga qytetarët, “verdiktin final do të merr në zgjedhjet qendrore se në ato lokale e ka marrë një mesazh nga qytetarët”.

“Vetëvendosje ka rënie drastike edhe me matje por edhe me rezultate reale. PDK-ja ka ngritje dhe e kemi një rezultat të mirë në zgjidhjet e fundit lokale”, përfundoi Gjoshi. /Telegrafi/