Real Madridi e sheh Bruno Guimaraesin si zëvendësuesin ideal të Casemiros

Mesfushori brazilian Casemiro është duke i kaluar ditët e fundit si futbollist i Real Madrid.

Casemiro karrierën pritet të vazhdojë në Manchester United ku sot janë planifikuar edhe testet mjekësore të brazilianit në Angli.

Los Blancos nga shitja e mesfushorit brazilian pritet të fitojnë mbi 70 milionë euro dhe menjëherë kanë filluar të mendojnë për zëvendësuesin e tij.

Marca ka raportuar se një brazilian tjetër është paraparë për ta zëvendësuar Casemiron në Santiago Bernabeu.

Fjala është për mesfushorin e talentuar të Newcastle United, Bruno Guimaraes i cili ka shkëlqyer në Ligën Premier në këto muajt e parë.

Kampioni në fuqi i Evropës po e monitoron situatën e lojtarit edhe pse vështirë se mund ta transferojnë atë nga Newcastle, duke marrë parasysh fuqinë financiare të skuadrës angleze.

Gjithnjë sipas Marcas ky operacion për Real Madridin do të ishte shumë i vështirë, pasi ‘Laraskat’ e vlerësojnë yllin e tyre mbi 100 milionë euro.

Gjithsesi Los Blancos kanë shprehur interesimin e tyre për të dhe mbetet të shihet nëse do të bëjnë hap përpara për transferimin e brazilianit në Santiago Bernabeu. /Telegrafi/