Çmimet e larta rrisin të ardhurat e buxhetit në Shqipëri, 287.7 milionë euro më shumë në arkën e shtetit në janar-prill

Çmimet e rritura kanë shkaktuar vështirësi në buxhetin e familjeve, por jo në arkën e shtetit. Vetëm në katër muajt e parë të vitit, buxheti ka mbledhur 188 miliardë lekë [1.5 miliardë euro], ose 35 miliardë lekë [287.7 milionë] më shumë se në janar-prill 2021.

Nga tatimet dhe doganat janë mbledhur gjithsej 165 miliardë lekë [1. 4 miliardë euro]. Në dogana, pjesën më të madhe e zë tatimi mbi vlerën e shtuar (TVSH) e importit, që është 10 për qind më e lartë se vitin e kaluar, ndërsa renta minerare rezulton 80 për qind më shumë se vjet, ka thënë Ministria e Financave në një njoftim për shtyp.

Edhe në tatime, të ardhurat janë 26 për qind më të mëdha se një vit më parë. Këtu del që vetëm nga TVSH, shteti ka arkëtuar një shumë dy herë më të lartë se vjet, ndërsa në vlerë paratë e të punësuarve që shkojnë për kontributet e pensioneve dhe ato shëndetësore janë më të larta.

Nga ana tjetër, qeveria dhe bashkitë nuk e kanë lëshuar dorën me shpenzimet. Në vlerë ato janë të njëjta me vitin e kaluar, por me çmimet e rritura në treg, ato janë më të pakta.

Në diferencën mes të ardhurave dhe shpenzimeve, ky vit rezulton me suficit 19 miliardë lekë [156.2 milionë euro]. /Telegrafi/