“U mbyte tu rrejt”, “Ruje veten, mos ofendo”, – përplasje në Kuvend mes Besnik Bislimit dhe deputetëve të AAK-së dhe PDK-së

Zëvendëskryeministri Besnik Bislimi ka reaguar ndaj deklaratës së shefit të Grupit Parlamentar të AAK-së, Besnik Tahiri, i cili përmendi shifrat e rritjes së çmimit të energjisë.

Zëvendëskryeministri Bslimi iu drejtua Tahirit “pse po rren”.

“Po i drejtohem z.Tahirit dhe marrjen e çmimit për 21 cent si referencë dhe krahasimit me Italinë. Ata që i kanë ba veç dy mësime statistikë e dinë sa e rrezikshme është kur e përdor një numër e se dinë në shërbim të çka po e përdor. Mundesh me bërtit sa të dush, por kualitetin e të dhënave nuk e përmirëson. Me mundu me ta vizatu z.Besnik Tahiri, nëse e ke nga 0 deri 100 një çmim dhe nga 100 deri në 110 e dyfishon çmimin, rritja është 9 % nuk është 100 %. Çmimi prej 14 cent dhe 21  cent për të cilin po e manipulon, aplikohet vetëm për ata që konsumojnë më shumë se 600, nuk është rrit tarifa. U mbytem tu ju than mos rreni po prapë po dilni po rreni”, tha Bislimi.

Pas kësaj deputetët e opozitës filluan të bërtisnin dhe t’i binin tavolinave, shkruan Telegrafi.

Bislimi iu drejtua edhe deputetes së LDK-së, Hykmete Bajramit. “E nderuara deputete Bajrami, ju e shpjeguat më së miri esencën e problemit, ju thatë se nuk e keni ndreq Kosovën A se keni dashtë me bo Kosovën e Re. Kemi lejuar shkatërrimin e Kosovës A për me ndërtu Kosovën e Re”, tha Bislimi.

Pastaj, ndërhyri edhe kryeparlamentari Glauk Konjufca i cili u kërkoi deputetëve të jenë më të disiplinuar.

“Ju lutem respektojeni njëri tjetrin kur të flisni. Është e vërtetë që fjala gënjeshtër është përdor shpesh në parlament dhe nuk ju kisha propozua askujt me përdor”, tha Konjufca.

Menjëherë replikë ka kërkuar shefi i Grupit Parlamentar të PDK-së, Abelard Tahiri.

“Duhet me ja tërheq vërejtjen zëvendëskryeministrit sepse është e turpshme me dalë me ju thanë deputeteve po rreni. Në mungesë të argumenteve ky del thotë akuza dhe të pavërteta. Nuk është gjendja alarmante këtu sa është te qytetarët. Kur t’i paguajmë faturat e këtij muaji do të shohësh çfarë reagimi kanë me pas qytetarët. Në fund të muajit do ta shohim a po rreni ju apo ne”, tha Tahiri.

Pas Tahirit, reagoi edhe shefi i Grupit Parlamentar të AAK-së, Besnik Tahiri i cili tha se nuk i merr personale ofendimet e zëvendëskryeministrit.

“Zëvendëskryeministri del thotë po rreni deputetë. Këtë e thotë sepse ka dështuar dhe mundohet që përmes ofendimit të mbroj një kauzë. Shumë shpejt do të vërtetohet se kjo që ju po e thuani është mashtrimi më i madh që po i bëni qytetarëve. Jeni tu dashtë me kamuflua, do ta ndalim këtë nëse jo në Kuvend do ta ndalim me të gjitha mjetet demokratike. Ruaje veten, mos ofendo”, tha Tahiri. /Telegrafi/