Deputeti i VV-së i kundërpërgjigjet opozitës pas kritikave për programin qeverisës

Deputeti i Lëvizjes Vetëvendosje, Fitim Uka i’u është kundërpërgjigjur kritikave opozitare rreth programit të Qeverisë Kurti.

Ai në seancën e Kuvendit, pyeti opozitarët se a kanë qenë në pushtet deri para pak kohësh, e që tash po kritikojnë për mungesë të operacionalizimit të programit qeverisës.

Deputeti i pushtetit tha se do të ishte shumë më e lehtë nëse Qeveria Kurti do të trashëgonte punë të mirë, por kjo qeveri trashëgon pushtetin nga një qeveri ilegale.

“Hajde po e marrim si të mirëqenë se kjo qeveri nuk di, siç po e thoni ju. Hajde po e pranojmë siç po thoni edhe ky program nuk është program. Hajde po iu bëjmë qejfin se ju jeni më të mirë. Por ku keni qenë deri sot, ju. Ju keni qenë këtu prapa, ju keni shkru programe, i kemi lexu. Kështu kur po kërkoni operacionalizim dhe metrik në programin qeverisës a keni mundësi me na tregu sa përqind të planeve të programeve të juaja i keni realizu”, tha ai.

Projektet e trashëguara nga ish pushteti, Uka tha se do të kthehen prapa.

“Do të ishte shumë e lehtë nëse qeveria do të trashëgonte punën e mirë dhe projektet e dobishme për vendin nga një qeveri normale. Por kjo qeveri trashëgon pushtetin nga një qeveri ilegale. Një qeveri të gjepit dhe projekteve që kanë ushqyer interesa klientë lista. Prandaj për shumë projekte që janë nisur duhet të bëhet një kthim i plotë prapa, për shumë projektet që kanë lëvizur djathtas duhet të bëhet kthesa e parë majtas. Për shumë projekte që kanë nisur ne fakt duhet edhe komision hetimor parlamentar dhe ftesë për prokurorinë”, u shpreh Uka.