Haxhiu takohet me Kryetarin e Zyrës së Këshillit të Evropës, flasin për sundimin e ligjit

Ministrja e Drejtësisë, Albulena Haxhiu ka pritur në takim Kryetarin e Zyrës së Këshillit të Evropës në Kosovë, Frank Power dhe bashkëpunëtorët e tij.

Power potencoi njëmbëdhjetë projekte që Këshilli i Evropës zbaton në fushën e të drejtave të njeriut, për sundim të ligjit, trafikim të qenieve njerëzore, etj.

“Përfaqësuesit nga Zyra e Këshillit të Evropës diskutuan për rëndësinë e infrastrukturës më të mirë ligjore lidhur me sinjalizuest, dhe ofruan gjithashtu ekspertizë për angazhim në konfiskimin dhe sekuestrimin e pasurisë, si dhe shprehën mbështetjen për projektet tjera të cilat ndërlidhen me qasje më të lehtë në gjykata, digjitalizim të sistemit të drejtësisë dhe gjithashtu përdorim në teknologjinë e informacionit në gjykata, si dhe asistencë ndaj viktimave të dhunës”, thuhet në njoftimin e bërë nga Ministria e Drejtësisë.

Tutje, në njoftim thuhet se ministrja e Drejtësisë njoftoi për një takim që po mbahet me mbështetësit e Ministrisë së Drejtësisë, për finalizim të prioriteteve dhe po ashtu njoftoi lidhur me veprimet në rishikimin funksional, vettingun, luftën kundër krimit të organizuar dhe korrupsionit, krimet e luftës, dhe dhunën në familje.

“Lidhur me sinjalizimin, Ministrja i njoftoi se është kompletuar rregullorja e sinjalizuesit, e cila brenda javës do të miratohet edhe në Qeveri. Për zotimet e shprehura, palët u pajtuan për bashkëpunim të mëtutjeshëm”, vijon njoftimi. /Telegrafi/