Pamje të tmerrshme nga Brazili: Familjarët e të prekurve me COVID-19 presin me orë të tëra në radhë, për të siguruar oksigjen

Në një vend tashmë të goditur rëndë nga coronavirusi, mungesat e oksigjenit dhe rastet në rritje me COVID-19 e kanë shtyrë Manaus, kryeqyteti i shtetit Amazonas, në një krizë të kujdesit shëndetësor.

Sipas CNN, përcjell Telegrafi, infermierët në qytet janë cituar në raportet e lajmeve lokale të thonë se pacientët kanë vdekur nga asfiksia në spitalet e qytetit sepse nuk ka oksigjen për t’iu dhënë atyre.

Ndërkohë janë publikuar edhe pamje që tregojnë familjarë të shumtë që presin për orë të tëra në radhë për të siguruar oksigjen.

Në këtë drejtim, qeveria braziliane është vënë nën kritika të ashpra për trajtimin e krizës.

Siç shkruan CNN, javën e kaluar, gjykatësi i Gjykatës së Lartë, Ricardo Lewandowski, urdhëroi qeverinë të paraqiste një plan përgjigje për të zgjidhur mungesën e oksigjenit, duke përmendur “sjelljen mohuese” të administratës së Jair Bolsonaro në adresimin e urgjencës.

Ndërkohë të dielën, Prokurori i Përgjithshëm i Bolsonaros, José Levi do Amaral dërgoi një raport me 16 faqe që mbronte përgjigjen e qeverisë në gjykatë.

Raporti zbulon se ministria federale e shëndetësisë dinte për krizën gjashtë ditë para se situata të bëhej kritike më 14 janar.

Ai gjithashtu thekson se qeveria lokale në Amazonas nuk informoi autoritetet federale në lidhje me mungesën e oksigjenit.

“Ministria e Shëndetësisë… u bë e vetëdijshme më 8 janar përmes një e-mail dërguar nga prodhuesi i produktit”, thekson raporti.

Ofruesi, i quajtur në raport si White Martins, së pari njoftoi qeverinë e Shtetit Amazonas dhe pastaj autoritetet federale, thotë raporti.

Nuk është e qartë pse njoftimi i qeverisë federale për mungesat e oksigjenit dyshohet se iu la një kontraktori privat.

Sipas raportit të Avokatit të Përgjithshëm, departamenti i shëndetit Manaus kishte qenë i vetëdijshëm se sistemi shëndetësor i qytetit ishte në prag të kolapsit që nga fillimi i janarit. /Telegrafi/