Behramaj thotë se Kurti e ka kërcënuar Gjykatën Kushtetuese

Adil Behramaj, këshilltari i Presidentit Hashim Thaçi, ka reaguar ndaj kryeministrit në detyrë, Albin Kurti, për shkresën drejtuar Gjykatës Kushtetuese, në lidhje me trajtimin e kushtetutshmërisë së vendimit të dytë të ekzekutivit për kufizimin e lirë së lëvizjes së qytetarëve në kohë pandemie.

Përmes një shkrimi në Facebook, ka thënë se në shkresë thuhet për dyshime për jo profesionalizëm, shkelje të ligjit, e anshmëri në vendim, nga ana e Gjykatës Kushtetuese.

Behramaj thotë se kjo nuk guxon të ndodhë në një shtet demokratik.

“Gjykata Kushtetuese është autoriteti përfundimtar në Republikën e Kosovës për interpretimin e Kushtetutës dhe përputhshmërisë së ligjeve me Kushtetutën. Ajo është e pavarur në kryerjen e përgjegjësive të saj. Por, para 9 ditësh, Albin Kurti si kryeministër në detyrë i paska dhënë vetës të drejtë ta gjykojë edhe Gjykatën Kushtetuese”, thotë ai.

Sipas tij, Kurti me këtë qasje po tregon që për gjithçka si autoritet përfundimtar e njeh vetëm veten e tij.

“Pavarësisht pëlqimit apo mospëlqimit të vendimeve të saj, Gjykatës Kushtetuese ia respektojnë të gjithë autoritetin dhe pavarësinë. Ndërsa, si kryeministër në detyrë i Qeverisë së Kosovës, ky edhe zyrtarisht e paska quajtur joprofesionale dhe të anshme. Si të kundërligjshme dhe si presion mbi Qeverinë i paska cilësuar edhe njoftimet e saj”.

“Në këtë “përkujtesë” zyrtare, Kurti e paska akuzuar Gjykatën Kushtetuese edhe për privilegjim të parashtruesve të kërkesave. Dhe, për të mos u mjaftuar me kaq, autoritetin përfundimtar të interpretimit ligjor në Republikën e Kosovës, që çdo institucion as nuk ia komenton vendimet, por thjesht i zbaton, Albin Kurti si kryeministër në detyrë edhe e paska kërcënuar”.

“Kjo nuk guxon të ndodhë në një shtet demokratik, por Kurti me këtë qasje po tregon që për gjithçka si autoritet përfundimtar e njeh vetëm veten e tij”, ka shkruar ai në Facebook./Telegrafi/