Publikohen imazhet satelitore – pamje që tregojnë dëmtimin e bazës amerikane, pas sulmit me raketa nga Irani

Disa pamje satelitore thuhet se tregojnë dëmtimin e bazës ajrore në Irak, pas sulmit me raketa nga Irani.

Siç shkruan Business Insider, përcjell Telegrafi, pamjet u morën pasi Irani nisi më shumë se një duzinë raketash në bazat që strehojnë forcat amerikane dhe të koalicionit në Irak herët në mëngjes të mërkurën – një sulm që shkaktoi disa dëme por nuk rezultoi në viktima.

Imazhet, të marra nga Planet Labs dhe të raportuara së pari nga NPR, tregojnë se struktura të shumta në bazën ajrore Al-Asad ishin goditur gjatë sulmit.

Objektet bazë që u dëmtuan nga sulmi duket se ishin pajisjet shtëpiake dhe aeroplanët sesa personeli, i tha NPR, Dave Schmerler, një analist në Institutin e Studimeve Ndërkombëtare të Middlebury në Monterey.

“Ndoshta ata kishin për qëllim të godisnin zonat me pajisje”, tha ai.

Zyrtarët amerikanë, sipas disa mediave, kanë thënë se provat sugjerojnë që Irani mund të jetë përpjekur qëllimisht të shmangë shkaktimin e viktimave që mund të shtyjnë SHBA-në që të hakmerret me forcë.

Duke folur të mërkurën, presidenti Donald Trump njoftoi se nuk kishte viktima amerikane dhe e karakterizoi dëmin në instalimet e synuara si “minimal”.

Kujtojmë se rritja e tensioneve në rajon ka ardhur pasi presidenti amerikan, Donald Trump autorizoi një sulm ndaj Qassem Soleimani.

Soleimani, arkitekti i operacioneve klandestine dhe ushtarake të Teheranit, si shef i forcave të Qudsit të Gardës Revolucionare, u vra të premten në një sulm me dron amerikan derisa gjendej në një kolonë në aeroportin e Bagdadit.

Si përgjigje, përveç sulmeve me raketa, autoritetet iraniane thuhet se kanë bërë të ditur se do të ofrojnë një shpërblim prej 80 milionë dollarësh për kokën e presidentit amerikan Donald Trump, pas vrasjes së gjeneralit Qasem Soleimani.

Sipas mediave, një “ofertë e tillë” është bërë gjatë transmetimit televiziv të funeralit nga transmetuesit zyrtarë shtetërorë.

Veç kësaj, Irani ka bërë të ditur se nuk do të respektojë me asnjë kufizim të marrëveshjes bërthamore të vitit 2015, njoftoi të dielën televizioni shtetëror i vendit.

Gjithashtu, vrasja e gjeneralit iranian ka ndikuar që një vendim të merret edhe nga Parlamenti i Irakut, i cili ka nxjerrë një rezolutë me të cilën kërkohet largimi i trupave amerikane nga vendi. /Telegrafi/