Çfarë mësuam nga ajo që i ndodhi Joshuas dhe ndikimi i përgjithshëm në boks

Andy Ruiz Jr. e bëri atë që shumëkush e mendonte si të pamundur duke e mposhtur Anthony Joshuan me nokaut teknik në raundin e shtatë të shtunën mbrëma dhe ia rrëmbeu të gjithë titujt në kategorinë e peshave të rënda.

ESPN ka sjellë një përmbledhje të asaj që ndodhi çfarë mësuam nga kjo, që konsiderohet si një prej fitoreve më befasuese në histori të boksit.

1. Ruiz fitoi, por a humbi boksi

Jo vetëm Joshua pësoi, kjo ishte humbje edhe për Deontay Wilder. Derisa amerikani mund të ndeshet me britanikun në të ardhmen, kurrë më nuk do ta ketë rëndësinë dhe interesimin e njëjtë siç ka ndodhur në periudhën kur të dy ishin të pamposhtur.

Para fundjavës që kamë pas, tifozët e boksit e kanë dashur me ngul duelin e shumëpritur ndërmjet tashmë ish kampionit të WBA, WBO dhe IBF, dhe kampionit akoma të pamposhtur të WBC-së. Por, pasi Ruiz e rrëzoi katër herë Joshuan, dëshira për ta parë AJ kundër Wilderit në ring nuk është më e njëjta.

2. Mjekra është mangësia e Joshuas

Në raundin e tretë u mendua se do të ishte një duel i lehtë për Joshuan kur e rrëzoi kundërshtarin, por më pas u shndërrua në makth për ish-kampionin e unifikuar botëror, i cili u kundërsulmua dhe u rrëzua dy herë në raundin e tretë.

Nga ky moment, AJ ishte i paqëndrueshëm dhe nuk mund të qëndronte në këmbë. Dhe pas dy rrëzimeve të tjera në raundin e shtatë, gjyqtari Michael Griffin e ndërpreu meçin me nokaut teknik. Nuk ka ndodhur kurrë që një njeri aq i fortë, të dukej aq i brishtë.

Me gjithë talentin që ka, Joshua ka një mangësi dhe ajo është mjekra e tij. Ka qenë vetëm çështje kohe se kur do të ekspozohet kjo gjë.

3. Pra, cili është boksieri më i mirë në kategorinë e peshave të rënda tash

Derisa Ruiz i ka tre tituj të rëndësishëm, a bën kjo më të mirin në botë? Jo, nuk është Ruiz. Por, ai do ta ketë mundësinë ta dëshmojë veten në muajt në vijim. Kampioni i WBC-së, Deontay Wilder dhe ish-kampioni i unifikuar, Tyson Fury, që u ndanë baras në muajin dhjetor, tash konsiderohen si boksierët më të mirë në kategorinë e peshave të rënda.

Është raportuar se Wilder dhe Fury kanë arritur marrëveshje për rimeç që pritet ta zhvillojnë në muajt e parë të vitit 2020, ndërsa fituesi i atij dueli do të konsiderohet më i miri në këtë kategori. Por, para se të ndodhë ajo përballje, amerikani do të ndeshet me Luis Ortiz (në shtator), kurse britaniku do të ndeshet me Tom Schwarz më 15 qershor dhe pritet ta ketë një meç tjetër gjatë këtij viti.

4. A është rimeçi i menjëhershëm ide e mirë për Joshuan

Pas humbjes në New York ka nisur të dyshet se a do të jetë AJ më i njëjti. Humbjet e kësaj natyre mund të ndikojnë psikikisht te një boksier dhe pastaj edhe në aspektin fizik. Mburoja e pathyeshmërisë tashmë i është zhdukur Joshuas.

Nëse ai del përballë Ruiz brenda gjashtë muajve të ardhshëm, meksikano-amerikani do të ketë më shumë vetëbesim dhe të njëjtën fuqi, ndërsa britaniku të njëjta dyshime me të cilat u largua nga ringu të shtunën. Një tjetër humbje nga Ruiz do t’ia ulet shumë statusin, madje edhe në Britani të Madhe, ku ai vazhdon të konsiderohet ndër më të mirët në histori.

5. A meriton Ruiz lëvdata

Padyshim që po. Derisa zakonisht jepen arsyetime dhe rrethana të ndryshme për humbje të favoritëve në këtë mënyrë, mirëpo meritat dhe lëvdatat gjithmonë duhet t’u jepen fituesve për atë që kanë arritur.

Ruiz e zëvendësoi Jarrell Millerin (që u suspendua për shkak se doli pozitiv në doping), ndërsa edhe pse nuk është konsideruar boksier i të njëjtit nivel me AJ, ai kishte regjistruar vetëm një humbje në 33 duelet e tij, prandaj jo rastësisht e ka arritur këtë sukses.

Edhe pse ka një fizik që nuk lë përshtypje, talenti dhe fuqia kanë qenë gjithmonë të pranishme te meksikani. Ai nuk do të ketë kurrë muskuj dhe dukje si kolegët e tij, por e ka aftësinë natyrale për të boksuar.

/Telegrafi/