Gostivar, gjobitet me 2 mijë euro shkaktari i zjarrit të gomave në fshatin Zdunjë

Shërbimet inspektoriale komunale në Gostivar kanë dënuar piromanin e gomave të vjetra, me gjobë prej rreth 123 mijë denarëve.

Zjarri shpërtheu në fillim të muajit mars, ndërsa nga djegia e gomave të vjetra të autobusit, qyteti u mbulua me tym të zi. Nga Vetëqeverisja lokale sot në konferencë për shtyp informuan se zjarrvënësi e ka paguar dënimin, përcjell Telegrafi Maqedoni.

“Administrata komunale në Gostivar është e vendosur për luftë kundër ndotjes së ambientit jetësor. Në këtë drejtim, inspektorët komunal kanë kryer kontrolle të rregullta parandaluese, ndërsa në raste të caktuara marrin edhe masa represive, gjegjësisht shkelësit i dënojnë me gjoba në pajtim me ligjin. Sa i përket rastit të fundit të djegies së gomave të vjetra në afërsi të fshatit Zdunjë, kryerësi i veprës është dënuar me 123 mijë denarë, të cilën e ka paguar”, thonë nga Komuna e Gostivarit.

Ata apeluan tek subjektet dhe qytetarët që të kujdesen për ambientin jetësor dhe njoftuan se kontrollet do të vazhdojnë edhe në të ardhmen./Telegrafi/

Lexo po ashtu Digjen goma plastike në Gostivar, tymi i zi “mbulon” qytetin (Foto/Video)