Ujkani flet për takimin e fundit me Vokrrin: Kemi humbur një njeri shumë të madh

Portieri i përfaqësues së Kosovës në futboll, Samir Ujkani, mes shumë emocionesh ka folur rreth vdekjes së Fadil Vokrrit në ditën e varrimit te legjendës, duke e cilësuar si humbjen më të madhe që Kosova ka pasur viteve të fundit.

“Kemi humbur një person shumë të madh sikur në futboll, sikur si person është një humbje shumë e madhe për Kosovën. Të gjithë e dimë çka ka bërë ai për Kosovën. Si futbollist ka qenë nuk diskutohet të gjithë e dimë çfarë ka bërë, por si president i Federatës së Kosovës ka qenë ai i cili na ka bërë ëndrrën realitet dhe sot ka qenë një ditë shumë e shumë e rëndë”, është shprehur Ujkani, citon KosovaPress.

Në pyetjen rreth takimit të fundit që Ujkani ka pasur me kryetarin Vokrri, ai u emocionua shumë dhe kujtoi kohët pas grumbullit të përfaqësues dhe pas fitores kundër Shqipërisë, duke treguar edhe gëzimin e madh dhe krenarinë e kryetarit Vokrri.

“Ishim se bashku të gjithë së bashku pas grumbullimit. Kemi kaluar shumë mirë dhe e mbaj mend që ka qenë shumë krenar jo vetëm për rezultatin, por për ndeshjet e fundit që i kemi luajtur, që këta djem, të gjithë djem të ri, kanë mundur të bëjnë këtë performancë, këtë mentalitet të lojës”.

Lexo po ashtu Të gjitha lajmet për Fadil Vokrrin

“Ai ka qenë figurë babai për ne. E kam vërejtur se pas shumë kohe negative që kemi pasur me rezultate, ai ka qenë gjithmonë i lumtur me neve, por tash ai ka qenë edhe krenar.

“Dhe besoj që na la me këtë krenari dhe tash duhet të vazhdojmë këtë rrugë vetëm për të”, ka përfunduar deklaratën e tij Ujkani.

Kujtomë që Fadil Vokrri vdiq gjatë mëngjesit të ditës së shtunë pas një infarkti në zemër, ndërsa të dielën u përcoll për në banesën e fundit në varrezat në lagjen Arbëria.