Lajme Kosovë

Vuçiq: Ukraina humb gjithçka nëse e njeh Kosovën – letra e ligjvënësve amerikanë dhe evropianë kundër Serbisë

Para 2 vitesh

Presidenti serb Aleksandar Vuçiq tha sot se e ka parë letrën e 56 deputetëve dhe se “është krenar” që e fajësojnë për mosnjohjen e pavarësisë së Kosovës dhe mbrojtjen e interesave të popullit serb në Bosnjë e Hercegovinë dhe në Mal të Zi. Ai ka komentuar edhe deklaratën e ambasadorit të Ukrainës në Serbi, Volodymyr Tolkach, i cili tha të martën se në shoqërinë ukrainase po rriten zërat gjithnjë e më shumë për njohjen e pavarësisë së Kosovës.

Vuçiq tha se e kishte parë letrën në të cilën ishte sulmuar personalisht dhe në të cilën ishte fajësuar “për ndihmën e popullit të Republikës Srpska”.

“Unë po bëj probleme në Kosovë sepse nuk e njoh pavarësinë. Mediat thonë se letra është kundër Vuçiqit, por mua më drejtohet vetëm formalisht dhe në thelb është kundër Serbisë. Unë jam fajtor që nuk e kam njohur pavarësinë e Kosovës dhe kështu kam shkaktuar destabilitet dhe probleme”, ka thënë Vuçiq, transmeton Telegrafi.

“Unë jam krenar që Alicia Kearns dhe Bob Menendez më sulmojnë mua, por jam krenar edhe kur e shoh se emrat që ishin më parë nuk janë më aty”, shtoi Vuçiq.

Siç raportojnë mediat serbe Vuçiqi i bëri këto komente gjatë një konference të përbashkët për media me kryeministren e Serbisë, Ana Bërnabiq, në Beograd, ku iu përgjigjën pyetjeve rreth një letre të deputetëve nga vendet e Bashkimit Evropian (BE) dhe Shtetet e Bashkuara, të cilët kërkuan masa më të rrepta ndaj Serbisë.

Më 7 gusht, dhjetëra politikanë nga Evropa dhe Shtetet e Bashkuara ia dërguan një letër zyrtarët të lartë të BE-së dhe Uashingtonit, duke iu kërkuar ta ndryshonin qasjen ndaj Kosovës dhe Serbisë.

I pyetur për disa njoftime se Ukraina mund ta njohë Kosovën, Vuçiq tha se Ukraina është një vend mik i Serbisë dhe se “ne kurrë nuk kemi pasur konflikte apo probleme me atë vend”.

“Unë gjithashtu shpresoj se nuk do ta kemi, shpresoj që presidenti Volodymyr Zelensky të jetë shumë më i mençur dhe më i zgjuar se kreu i Komisionit për Punë të Jashtme të Parlamentit të Ukrainës, Moreshko”, tha Vuçiq.

“Imagjinoni nëse Ukraina e njeh Kosovën, në një ditë humbet gjithçka, gjithë kredibilitetin e saj politik në përgjithësi, nuk po flas fare për marrëdhëniet me Serbinë. Si mund të thotë atëherë se i përmbahet Kartës së OKB-së”, pyeti Vuçiq.

Ambasadori i Ukrainës në Serbi, Volodymyr Tolkach, tha të martën se në shoqërinë ukrainase po rriten zërat gjithnjë e më shumë për njohjen e pavarësisë së Kosovës, dhe se një numër i caktuar i deputetëve në Parlamentin e Ukrainës po e përkrahin qëndrimin për njohjen e mundshme të Kosovës.

“Qëndrimi i Ukrainës është parimor dhe i qëndrueshëm – Ukraina e respekton integritetin territorial të Serbisë”, thuhet në komunikatën e ambasadorit Tolkach.

Por, Toklach tha se lidershipi i Kosovës “ka marrë qëndrim të qartë për dënimin e agresionit rus ndaj Ukrainës, posaçërisht duke e sanksionuar agresorin”.

Ai e pranoi se nuk është befasi se zërat po rriten gjithnjë e më shumë në shoqërinë ukrainase në përkrahje të njohjes së pavarësisë së Kosovës.

“Ukraina, si vend demokratik i cili e respekton lirinë e fjalës, nuk mund ta kufizojë shprehjen e mendimit të politikanëve të tjerë, të rrethit profesional apo publikut”, theksoi ai. /Telegrafi/