Qyteti afër Kievit është “gati tërësisht i shkatërruar”

Oleksiy Kuleba, kreu i Administratës Shtetërore Rajonale të Kievit, tha se një qytet në veriperëndim të Kievit është “pothuajse plotësisht i shkatërruar”.

“Nuk ka ujë dhe energji elektrike atje … Nuk ka Borodyanka. Është pothuajse plotësisht i shkatërruar. Qendra e qytetit është thjesht e tmerrshme. Borodyanka është nën ndikimin e trupave ruse; ata kontrollojnë këtë vendbanim”, tha Kuleba, raporton cnn.

Kuleba pohoi më herët sot se trupat ruse dukej se kishin marrë nën kontroll një spital psikiatrik me qindra pacientë, por tani janë larguar.

“Këta njerëz janë kryesisht të sëmurë, janë kryesisht njerëz me nevoja të veçanta. Por këta janë njerëzit tanë dhe ne nuk mund t’i lëmë dhe nuk do t’i lëmë kurrë”, tha më herët Kuleba.

“Sot nuk e kuptojmë se si t’i evakuojmë këta njerëz, si t’i ndihmojmë ata”, tha ai, duke shtuar se atyre po u mbarojnë ilaçet dhe uji.

Pas një sulmi me raketa në një bllok të madh apartamentesh në Borodyanka më 2 mars, Shërbimi Shtetëror i Emergjencave të Ukrainës njoftoi se njerëzit mund të jenë ende të bllokuar në rrënojat e ndërtesës.

Borodyanka ka parë granatime të vazhdueshme gjatë ditëve të fundit, ashtu si edhe qytetet e vogla përreth. /Telegrafi/