Nuk ka fitues në kryeqytet, Flamurtari dhe Gjilani ndajnë pikët

Ka përfunduar pa fitues ndeshja e fundit e javës së tetë në Superligën e Kosovës mes Flamurtarit dhe Gjlanit 1-1.

Ndeshja nisi me një rast të mirë shënimi të mysafirëve, kur në minutën e tretë kapiteni i Gjilanit, Ylber Kastrati goditi nga distanca por edhe më mirë intervenoi portieri vendas Besnik Shehu.

Flamurtari i kundërpërgjigj me gol në minutën e gjashtë me golashënuesin e tyre më të mirë Alban Shillova.

Shillova realizoi gol të bukur me gërshërë edhe pse mysafirët protestuan për pozitë jashtë loje, por kështu nuk menduan gjyqtarët e ndeshjes.

Flamurtari nuk i ndali sulmet dhe krijuan dy raste të mira me Ben Quansah dhe Alban Shillovën, por që nuk arritën cakun.

Gjilani rast të mirë pati edhe në minutën e 30-të, kur Wilber Perez pasi shmangi mirë mbrojtësin vendas Quansah goditi bukur por jo saktë.

Bardh e kuqtë arritën golin e barazimit në minutën e 40-të, falë golit të shënuar nga Trevin Ceaser pas asistimit nga Nika.

Me rezultatin e barabartë 1-1 përfunduan 45 minutat e para të kësaj sfide.

Në pjesën e dytë më shumë nga loja patën vendasit, por që nuk arritën të shënonin golin e fitores.

Kësisoj me rezultatin e barabartë 1-1 përfundoi ndeshja e fundit e javës së tetë në Ipko Superligën e Kosovës.

Flamurtari pas kësaj pike të fituar ngjitët në pozitën e tretë në tabelë me 15 pikë, ndërsa Gjilani me 14 sosh mbetet në pozitën e pestë.

Në ndeshjen e ardhshme, Flamurtari luan në udhëtim te Trepça ’89, ndërsa Gjilani pret Lirinë. /Telegrafi/