Modric: Ronaldo më uroi për Topin e Artë – do ta kisha shkëmbyer për Kupën e Botës

Luka Modric ka thënë se Cristiano Ronaldo e kishte uruar në vitin 2018 kur mesfushori e mposhti në garën për Topin e Artë.

35-vjeçari u vlerësua pasi e fitoi Ligën e Kampionëve me Real Madridin (së bashku me portugezin) dhe luajti në finale të Kampionatit Botëror me Kroacinë.

CR7, i cili ishte transferuar më pas te Juventusi, mbeti prapa tij, por sipas Modric, superylli i Zonjës së Vjetër e kishte uruar ish-bashkëlojtarin e tij për arritjen e madhe.

“Cristiano Ronaldo më uroi kur e fitova Topin e Artë”, ka thënë kroati në një intervistë për FourFourTwo.

“I ruajmë kontaktet, sepse loja me të ka qenë e mrekullueshme dhe e veçantë. Ai ishte shumë kërkues… gjatë ndeshjeve kërkonte që të gjithë të jepnin më të mirën dhe na motivonte”, ka shtuar mesfushori.

Megjithatë, Modric ka thënë se me shumë dëshirë do ta sakrifikonte Topin e Artë po ta kishte fituar Kupën e Botës me Kroacinë.

“Do ta shkëmbeja Topin e Artë për një Kupë të Botës me Kroacinë. Cmimet individuale janë spektakolare, por për mua objektivat kolektive janë më të rëndësishme”, ka deklaruar kroati. /Telegrafi/