Krasniqi: Ikja masive e të rinjve tejkalohet me ofrimin e mundësive të barabarta në Kosovë

Kryetari i Partisë Demokratike të Kosovës (PDK), Memli Krasniqi është shprehur se në vendin tonë nuk është arritur të sigurohet trajtimi meritor për çdo punëtor.

Krasniqi në Ditën Ndërkombëtare të Punëtorëve, ka përmendur sfidën e emigrimit masiv të të rinjve nga Kosova duke theksuar se kjo duhet të tejkalohet me krijimin e një ambienti që ofron mundësi të barabarta.

“Si shtet e si shoqëri ende s’kemi arritur që të sigurojmë trajtimin meritor për çdo punëtor, në cilindo sektor që punon. Për më shumë, sfidën e madhe të emigrimit masiv të të rinjve tanë që kërkojnë një perspektivë larg Kosovës, duhet ta tejkalojmë përmes angazhimit konkret në krijimin e një ambienti të favorshëm që ofron mundësi të barabarta, vende pune me paga konkurruese dhe vlerësim të drejtë për kontributin e punëtorëve”, ka shkruar Krasniqi në Facebook.

Këtë vit, 1 Maji në Kosovë është shënuar me dy protesta të sindikatave të sektorit privat dhe një aksion simbolik nga Partia Socialdemokrate.

Dita Ndërkombëtare e Punës lindi nga lufta e punëtorëve për të kërkuar dhe siguruar të drejtat, liritë dhe kushtet e punës e të jetesës.

Lëvizja nisi më 1884, kur Federata e Tregut të Organizuar dhe Bashkimi i Punëtorëve hartoi rezolutën se “duke nisur nga 1 maji 1886 orari i punës për të gjithë punëtorët duhej të ishte 8-orësh”. Më 1 maj të vitit 1886 mbi 200 mijë punëtorë, të mbledhur në sheshin qendror të Çikagos, do të nisnin grevat për të kërkuar të drejtat e tyre. /Telegrafi/