Ekspertët në Gjermani rekomandojnë dozën e tretë të vaksinës për të gjithë personat mbi moshën 18-vjeçare

Komiteti këshillues i vaksinave në Gjermani po rekomandon dozat përforcuese kundër COVID-19 për të gjithë njerëzit mbi moshën 18-vjeçare.

Sipas medieve të huaja, përcjell Telegrafi, udhëzimi i përditësuar vjen pasi rastet me coronavirus në Gjermani arritën të enjten në një nivel të lartë prej 65 mijë.

Komiteti STIKO thotë se rekomandon gjithashtu që dozat e treta të jenë nga një vaksinë mRNA, siç janë ato të Pfizer-BioNTech dhe Moderna-s dhe duhet të jepet gjashtë muaj pas dozës së dytë.

Ndryshe, Organizata Botërore e Shëndetësisë (OBSH) ka thënë se Evropa ishte i vetmi rajon në botë ku vdekjet nga COVID-19 u rritën javën e kaluar, pas një rritje prej 5 për qind.

Në raportin e saj javor mbi pandeminë të lëshuar të martën, OBSH tha gjithashtu se rastet u rritën me 6 për qind globalisht, të nxitur nga një rritje në Amerikë, Evropë dhe Azi.

OBSH tha se vdekjet nga COVID-19 në të gjitha rajonet përveç Evropës mbetën të qëndrueshme ose ranë javën e kaluar, duke arritur në 50,000 në të gjithë botën. /Telegrafi/