Beogradi: Qëndrimi i Prishtinës duhet të zbutet

Zëdhënësi i Qeverisë së Serbisë, Milivoje Mihajlovic, tha se pengesë kryesore në dialogun Serbi–Kosovë, është qëndrimi i fortë i Prishtinës.

“Prishtina nuk dëshiron të japë disa fuqi ekzekutive për Asociacionin e Komunave serbe, që do të mundësonin ekzistencën serbe në Kosovë”, tha Mihajlovic, dhe shtoi se “mendon se kjo është pengesa kryesore”.

Mëtutje, ai i tha agjencisë Reuters në Beograd se “qëndrimi i linjës së fortë i Prishtinës, duhet të zbutet me qëllim që të arrihet paqja jo vetëm në Kosovë, por edhe në gjithë rajonin”, transmeton Rel.

Sipas tij, në ditët e ardhshme, të dy palët do të konsolidohen dhe dialogu do të vazhdoj.

Zëdhënësi i Qeverisë së Serbisë tha se “roli vendosës i BE-së dhe SHBA-ve duhet të rezultojë me vazhdim të dialogut dhe përpjekje serioze që të dy palët të sillen më afër marrëveshjes”.

Këto komente u bën pasi bisedimet e mbrëmshme ndërmjet kryeministrave të dy vendeve, Hashim Thaçi dhe Ivica Dacic, përfunduan pa arritjen e ndonjë marrëveshjeje. /Telegrafi/