Pas takimit SHBA-Rusi në Arabinë Saudite, reagon Zelensky

Volodymyr Zelensky është takuar sot me presidentin e Turqisë, Recep Tayyip Erdogan, në kuadër të një sërë përpjekjesh diplomatike për të forcuar mbështetjen ndërkombëtare për Ukrainën.

Takimi mes dy liderëve vjen në një moment kyç, ndërsa lufta në Ukrainë vazhdon dhe përpjekjet për një zgjidhje diplomatike janë intensifikuar.

Gjatë deklaratës për mediat, Zelensky theksoi se negociatat për t’i dhënë fund luftës nuk duhet të zhvillohen “pas kurrizit tonë”, duke reaguar ndaj një takimi të zhvilluar sot në Arabinë Saudite mes zyrtarëve të lartë amerikanë dhe rusë, shkruan skynews.

Lexo po ashtu SHBA dhe Rusia përfundojnë bisedimet e para pa Ukrainën, Moska me kërkesa të reja

Ai nënvizoi rëndësinë e përfshirjes së Ukrainës dhe vendeve evropiane në çdo diskutim që lidhet me të ardhmen e vendit të tij, duke shtuar se një paqe e qëndrueshme mund të arrihet vetëm përmes një procesi transparent dhe gjithëpërfshirës.

Lideri ukrainas gjithashtu njoftoi se ka shtyrë vizitën në Arabinë Saudite deri më 10 mars, duke theksuar se prioriteti mbetet koordinimi i mëtejshëm me aleatët për të siguruar mbështetje ushtarake dhe diplomatike për Ukrainën. Ai u shpreh se vendi i tij do të vazhdojë të luftojë për sovranitetin dhe integritetin e tij territorial, duke kërkuar mbështetje më të madhe nga partnerët ndërkombëtarë.

Lexo po ashtu Përfundon takimi në Riad, SHBA dhe Rusia bien dakord të caktojnë ekipe për të punuar në rrugën për t'i dhënë fund luftës në Ukrainë

Nga ana tjetër, presidenti turk Recep Tayyip Erdogan riafirmoi “mbështetjen e plotë të Turqisë për integritetin territorial dhe sovranitetin e Ukrainës”.

Ai theksoi rëndësinë e dialogut dhe diplomacisë për të gjetur një zgjidhje të drejtë dhe të qëndrueshme për konfliktin. Turqia, e cila ka luajtur një rol ndërmjetësues në të kaluarën mes Ukrainës dhe Rusisë, vazhdon të mbështesë përpjekjet për paqen dhe stabilitetin në rajon. /Telegrafi/