Clinton, Washington, Johnson dhe Messi ndër të dekoruarit me medaljen më të lartë civile amerikane

Gjatë ceremonisë, Biden vlerësoi përpjekjet dhe arritjet e këtyre individëve, të cilët, sipas tij, “kanë lënë një gjurmë të pashlyeshme në shoqërinë amerikane dhe më gjerë”.

Në deklaratën e saj, Shtëpia e Bardhë theksoi se të nderuarit janë dalluar për “kontributin e tyre të jashtëzakonshëm në begatinë, vlerat dhe sigurinë e Shteteve të Bashkuara, për paqen ndërkombëtare dhe përpjekjet e tjera të rëndësishme shoqërore, publike dhe private.”

Hillary Clinton u nderua për udhëheqjen e saj të gjatë politike dhe përkushtimin ndaj të drejtave të njeriut, ndërsa George Soros u vlerësua për mbështetjen ndaj lirisë dhe demokracisë në mbarë botën.

Nga ana tjetër, Denzel Washington, përveç karrierës së shkëlqyer në kinematografi, u njoh edhe për angazhimin në bamirësi dhe kauza humanitare.

Ceremonia ishte një moment emocionues, ku personalitetet e pranishme dhe të ftuarit nga fusha të ndryshme vunë në pah rëndësinë e bashkëpunimit, barazisë dhe respektimit të diversitetit si vlera themelore të shoqërisë amerikane.

Lista e plotë

Jose Andres, Bono, Ashton Baldwin Carter, Hilary Rodham Clinton, Michael J.Fox, Tim Gill, Jane Goodall, Fannie Lou Hamer, Earvin “Magic” Johnson, Robert Francis Kennedy, Ralph Lauren, Lionel Messi, William Sanford Nye, George W. Romney, David M. Rubenstein, George Soros, George Stevens, Jr., Denzel Washington dhe Anna Wintour.  /Telegrafi/