Mongolia detyrohet ta arrestojë Putinin

Zyrtarët mongolë “detyrohen” ta arrestojnë presidentin rus, Vladimir Putin nëse ai viziton këtë vend javën e ardhshme, ka thënë Gjykata Ndërkombëtare Penale (ICC).

Udhëtimi, që pritet të ndodhë të martën, do të jetë hera e parë që lideri rus viziton një vend anëtar të ICC-së që kur gjykata urdhëroi arrestimin e tij në mars të vitit 2023.

Gjykata pretendon se Putini është përgjegjës për krimet e luftës, duke thënë se ai nuk arriti të ndalonte dëbimin e paligjshëm të fëmijëve nga Ukraina në Rusi që nga fillimi i konfliktit.

Pavarësisht se zyrtarët në Ukrainë kërkojnë që Mongolia ta arrestojë Putinin sapo të arrijë në vend, Kremlini tha se nuk kishte “asnjë shqetësim” për vizitën.

“Ne kemi një raport të shkëlqyer me partnerët tanë nga Mongolia”, u tha gazetarëve në Moskë zëdhënësi i Kremlinit, Dmitry Peskov dhe shtoi se “sigurisht, të gjitha aspektet e vizitës së presidentit janë përgatitur me kujdes”.

Dr Fadi el-Abdallah, zëdhënës i ICC, i tha BBC-së të premten se gjykata mbështetet në anëtarët e saj – përfshirë Mongolinë – për të “ekzekutuar vendimet e saj”.

Ai tha se Mongolia, si nënshkruesit e tjerë të ICC, “detyrohet të bashkëpunojë”. Kjo përfshin respektimin e urdhrave të arrestit si ai që gjykata lëshoi për arrestimin e Putinit në vitin 2023.

Gjykata pretendoi se presidenti rus është përgjegjës për krimet e luftës, duke u fokusuar në dëbimin e paligjshëm të fëmijëve nga Ukraina në Rusi. Ajo ka lëshuar gjithashtu një urdhër për arrestimin e komisioneres ruse për të drejtat e fëmijëve, Maria Lvova-Belova, për të njëjtat krime.

Ai tha se krimet u kryen në Ukrainë nga 24 shkurt 2022 – kur Rusia filloi pushtimin e saj në shkallë të plotë. Moska i ka mohuar më parë akuzat dhe i ka cilësuar urdhërarrest si “të egër”.

Dr Abdallah tha se gjyqtarët e ICC-së do të shqyrtojnë rastet e “mosbashkëpunimit” nga nënshkruesit e tij dhe do të informojnë Asamblenë e Shteteve, e cila mund “të marrë çdo masë që e gjykon të përshtatshme”.

Ndryshe, ICC nuk ka kompetenca për të arrestuar të dyshuarit dhe mund të ushtrojë juridiksion vetëm brenda vendeve anëtare. /Telegrafi/