Bajrami deklarohet pas ndeshjes: Jemi gati, në Evropian do të luftojmë për çdo pikë

Shqipëria e kaloi me sukses edhe “testin” e fundit para fillimit të Euro 2024. Kuqezinjtë mposhtën me rezultat 3-1 Azerbajxhanin, në miqësoren e cila u zhvillua në Hungari.

Një prej lojtarëve më të spikatur në këtë takim ishte Nedim Bajrami, i cili shënoi golin e parë të kësaj sfide si dhe asistoi tek goli i tretë i shënuar nga Qazim Laçi.

Pas ndeshjes, Bajrami tha se te Shqipëria të gjithë janë të motivuar dhe se do të luftojnë në Evropian për çdo pikë.

“Këtu në kombëtare, jemi të gjithë të motivuar, çdokush do të japë maksimumin. Goditjet nga jashtë zonës i provojmë gjithmonë. Edhe Asani ndeshjen e kaluar dhuroi një supergol. Duhet të vazhdojmë kështu”.

Lexo po ashtu Shqipëria fiton me tre gola ndaj Azerbajxhanit testin e fundit - gati për Euro 2024

“Të gjithë do të shkojmë në Evropian, do të luftojmë për çdo pikë, për çdo top, jemi përgatitur shumë mirë. Besoj se jemi gati tani”.

“Me Brojën kuptohemi shumë mirë, jo vetëm në fushë, por edhe jashtë. Jemi të gjithë djemtë gati, e di trajneri kush do të fillojë”.

“Në këto 2 ndeshje jemi ndjerë shumë mirë. Kundërshtarët i kemi shumë të vështirë. Duhet të japim maksimumin”, është shprehur Bajrami.

Shqipëria ndeshjen e parë në Euro 2024 do ta luajë më datë 15 qershor ndaj Italisë me fillim nga ora 21:00./Telegrafi/