Kryeministri Sánchez thotë se do të propozojë që parlamenti spanjoll të njohë shtetin palestinez

Kryeministri spanjoll Pedro Sánchez tha të shtunën se do të propozojë që parlamenti spanjoll të njohë një shtet palestinez.

“Unë do të propozoj njohjen nga Spanja për shtetin palestinez”, tha Sánchez, shkruajnë mediat e huaja, përcjell Telegrafi. “Unë e bëj këtë për bindje morale, për një kauzë të drejtë dhe sepse kjo është mënyra e vetme që të dy shtetet, Izraeli dhe Palestina, të jetojnë së bashku në paqe”.

Sánchez shtoi zërin e tij në korin e liderëve të tjerë evropianë dhe zyrtarëve qeveritarë, të cilët kanë thënë se mund të mbështesin një zgjidhje me dy shtete në Lindjen e Mesme, ndërsa zhgënjimi ndërkombëtar rritet me veprimet e Izraelit në territoret palestineze.

Presidenti francez Emmanuel Macron tha muajin e kaluar se nuk është “tabu” që Franca të njohë një shtet palestinez.

Ministri i Jashtëm britanik David Cameron theksoi se Mbretëria e Bashkuar mund të njohë zyrtarisht një shtet palestinez pas një armëpushimi në luftën Izrael-Hamas.

Sánchez tregoi se pozicioni i tij për konfliktin në Rripin e Gazës është shumë i ngjashëm me mbështetjen e vendit të tij për Ukrainën pas pushtimit në shkallë të plotë të Rusisë më shumë se dy vjet më parë.

Ai theksoi se Spanja kërkon “respektimin e ligjit ndërkombëtar nga Rusia dhe Izraeli, që dhuna të përfundojë, njohjen e dy shteteve dhe që ndihma humanitare të arrijë në Gaza”.

Komentet e tij në një konferencë për të drejtat në qytetin e Bilbaos erdhën ndërsa dërgesat e ndihmave po niseshin për në Gaza në mes të krizës humanitare në Gaza dhe një gatishmërie të re ndërkombëtare për të punuar rreth kufizimeve izraelite.

Pesë muaj pasi militantët e Hamasit sulmuan Izraelin më 7 tetor, duke vrarë rreth 1,200 njerëz dhe duke marrë peng 250 të tjerë, ushtria izraelite ka goditur territorin, duke vrarë më shumë se 30,000 palestinezë, sipas Ministrisë së Shëndetësisë së Gazës. /Telegrafi/