Edhe deputeti i LDK-së bie pre e sulmeve kibernetike

Deputeti i Lidhjes Demokratike të Kosovës (LDK), Anton Quni, njoftoi të martën se ka rënë pre e sulmeve kibernetike.

Përmes një postimi në Facebook, Quni, i cili është edhe anëtar i Komisionit për Siguri, tha se nga e hëna janë sulmuar adresat e tij elektronike, facebook dhe instagram.

“Për momentin adresa ime në instagram gjendet në posedim të sulmuesit kibernetik”, shkroi ai, ndërsa bëri të ditur se për rastin i ka njoftuar edhe autoritetet.

“Me rastin janë të njoftuara autoritetet e PK-së. Faleminderit për mirëkuptim!”.

Ndryshe, sulme kibernetike ditëve të fundit ka pasur edhe ndaj mediave, bizneseve dhe institucioneve në Kosovë.

Lidhur me këtë, njohësi i fushës së kibernetikës, Tanzer Abazi tha se sulmet e tilla të ndaljes së shërbimeve (DDoS) nuk kërkojnë aftësi të larta profesionale për t’i ekzekutuar.

“Është e vërtetë qe trafiku ka mundur të jetë drejtuar nga Irani, Rusia dhe Kina por nuk nënkupton që akteri/sulmuesi nuk është nga Kosova apo ndonjë vend afër”, shkroi ai në llogarinë e tij në Facebook.

Sipas tij, institucionet duhet të jenë më të hapura me shoqëritë civile, mediat dhe grupet e ekspertëve.

Ndërsa, njohësi i sigurisë së softuerit, Kastriot Fetahaj, në një prononcim për Telegrafin ditë më parë ka thënë se këto lloj të sulmeve nuk kanë ndikim në të dhëna, pra nuk fshijnë, dëmtojnë ose vjedhin të dhëna përveç që pamundësojnë qytetarët që të marrin shërbime digjitale.

Fetahaj ka deklaruar se nuk është problem përballja me sulme të tilla, derisa ka kritikuar Qeverinë për sistemin e dobët.

“Zakonisht këto lloj sulmesh janë lehtë të menaxhueshme dhe të menjanueshme. Nëse ke një ekip të sigurisë profesional dhe dikush kryen një sulm të tillë brenda 5 minutash mundesh me ndal, por kjo nuk po ndodh në Qeveri apo në media. Kemi pas raste kohët e fundit që ka pas disa orë rënie të ueb faqeve të Qeverisë ndër të tjera e-Kosova”, është shprehur ai. /Telegrafi/