Dy synimet që fshihen pas zgjatjes së kontratës së LeBron James me LA Lakers – rekordi i pikëve në NBA dhe djali i tij

LeBron James rinovon me Los Angeles Lakers duke zgjatur edhe për dy vite për 97 milionë dollarë të garantuar, me opsion edhe për sezonin 2024-25.

James ishte në fund të kontratës edhe me një vit të fundit që i siguronte një pagë prej 44 milionë dollarësh.

Me këtë zgjatje të kontratës, James e bëri të qartë se dëshiron të arrijë dy rekorde të tjera të mëdha në karrierën e tij të pasur – të bëhet kosha-shënuesi më i mirë në historinë e NBA dhe të luajë me djalin e tij në kampionatin më të madh të basketbollit.

LeBron është kosha-shënuesi i dytë më i mirë në histori me 37,062 pikë, pas kryesuesit Kareem Abdul-Jabbar që ka shënuar 38,387 pikë në karrierën e tij.

Nëse James vazhdon të shënojë mesatarisht 27 pikë për ndeshje, ai do ta kalojë legjendarin Kareem tashmë këtë sezon dhe me kontratën e re me shumë gjasa do të bëhet lojtari i vetëm me më shumë se 40,000 pikë në NBA.

Dhe ndërsa të gjithë ishin të vetëdijshëm se LeBron një ditë do të thyente rekordin e Kareem, shumë ishin skeptikë kur disa vite më parë LeBron njoftoi se ai synonte të luante në NBA aq gjatë sa të luante me djalin e tij Bronny, dhe pas nënshkrimit të kontratës të re 2+1, kjo i jep një shans për përmbushjen e asaj ëndrre.

Bronny (17) aktualisht luan për Sierra Canyon High School në Los Angeles, dhe ai mund të aplikojë për draftin e NBA në verën e vitit 2024, kohë në të cilën LeBron do të fillonte vitin e fundit të kontratës së tij me Lakers.

He hasn’t taken 1 visit yet and has only had a few calls with coaches and universities. When Bronny makes his choice you’ll hear it from him. #JamesGang👑 https://t.co/BBciKxl7m8

— LeBron James (@KingJames) August 17, 2022

LeBron duhet të vendosë deri më 29 qershor 2024 nëse dëshiron ta zgjasë bashkëpunimin deri në sezonin 2025/2026, ku do të jetë 41 vjeç.

Kjo gjë që do ta bënte që familja James të ishte unike në historinë e NBA-së./Telegrafi/