Putini do të bëjë udhëtimin e parë jashtë vendit që nga fillimi i agresionit në Ukrainë

Vladimir Putin do të vizitojë dy ish-shtete të vogla sovjetike në Azinë Qendrore këtë javë në atë që do të ishte udhëtimi i parë i njohur i liderit rus jashtë vendit që kur urdhëroi pushtimin e Ukrainës.

Sipas mediave të huaja, përcjell Telegrafi, Pavel Zarubin, korrespondenti i televizionit shtetëror Rossiya 1 në Kremlin, tha se Putin do të vizitojë Taxhikistanin dhe Turkmenistanin dhe më pas do të takohet me presidentin indonezian Joko Widodo për bisedime në Moskë.

Në Dushanbe, Putin do të takohet me presidentin e Taxhikistanit, Imomali Rakhmon, një aleat i ngushtë rus dhe sundimtari më jetëgjatë i një shteti ish-sovjetik.

Në Ashgabat, ai do të marrë pjesë në një samit të vendeve të Kaspikut, duke përfshirë liderët e Azerbajxhanit, Kazakistanit, Iranit dhe Turkmenistanit, tha Zarubin.

Udhëtimi i fundit i njohur i Putinit jashtë Rusisë ishte një vizitë në Pekin në fillim të shkurtit, ku ai dhe presidenti kinez Xi Jinping zbuluan një traktat miqësie “pa kufij” disa orë përpara se të dy të merrnin pjesë në ceremoninë e hapjes së Lojërave Olimpike Dimërore.

Agresioni i Rusisë i filluar më 24 shkurt ka vrarë mijëra njerëz, ka zhvendosur miliona të tjerë dhe ka çuar në sanksione të rënda financiare nga Perëndimi, të cilat Putin thotë se janë një arsye për të ndërtuar lidhje më të forta tregtare me fuqi të tjera si Kina, India dhe Irani.

Rusia thotë se dërgoi trupa në Ukrainë “për të degraduar aftësitë ushtarake të fqinjit të saj, për të mos e përdorur atë nga Perëndimi për të kërcënuar Rusinë, për të çrrënjosur nacionalistët dhe për të mbrojtur rusishtfolësit në rajonet lindore”. /Telegrafi/