Në mesin e tyre edhe një britanik ‘shumë i rrezikshëm’ – zbulohen detaje rreth arratisjes së pesë të dënuarve nga burgu i sigurisë së lartë në Portugali

Një i burgosur britanik “shumë i rrezikshëm” është në mesin e pesë të burgosurve që janë arratisur nga një burg i sigurisë së lartë në Portugali.

Sipas mediave britanike, përcjell Telegrafi, Mark Cameron Roscaleer, 39 vjeç, kishte vuajtur një dënim me nëntë vjet për rrëmbim dhe grabitje në burgun Vale de Judeus, rreth 43 milje (70 km) në veri të Lisbonës.

Pesë burrat, të moshës midis 33 dhe 61 vjeç, u larguan të shtunën në mëngjes dhe morën “ndihmë të jashtme” nga bashkëpunëtorët që siguruan një shkallë që “i lejonte të burgosurit të ngjiteshin në mur”, sipas shërbimit portugez të burgut (DGRSP).

Frederico Morais, president i Unionit Kombëtar të Gardianëve të Burgut (SNCGP), e përshkroi Roscaleer si “shumë të rrezikshëm” dhe i këshilloi njerëzit që nëse e shohin atë ose të burgosurit e tjerë, nuk duhet t’u afrohen atyre.

Katër të arratisurit e tjerë janë:

• Fernando Ferreira, 61 vjeç, portugez, i dënuar me 25 vjet burg për trafik droge, vjedhje, grabitje dhe rrëmbim

• Fabio Loureiro, 33, portugez, i dënuar me 25 vjet burg për zhvatje, vjedhje dhe pastrim parash

• Rodolf Lohrmann, 59 vjeç, argjentinas, i dënuar me 18 vjet e 10 muaj për vjedhje, grabitje dhe pastrim parash

• Shergili Farjiani, 42 vjeç, me origjinë nga Gjeorgjia, u dënua me shtatë vjet për krime të dhunshme vjedhje dhe falsifikim

Të arratisurit ‘shumë të rrezikshëm’

Sipas gazetës portugeze Jornal de Noticias, grupi kishte ndihmën e tre bashkëpunëtorëve jashtë burgut dhe u larguan nga vendi i ngjarjes me dy makina, një Mercedes dhe një Volvo.

Luis Neves, drejtor kombëtar i Policisë Gjyqësore, tha për gazetën se, me përjashtim të Shergili Farjianit, të gjithë të burgosurit ishin “shumë të rrezikshëm” dhe arratisja e tyre ishte “shumë mirë e përgatitur”.

Ai theksoi gjithashtu në një konferencë shtypi të dielën se ata “tashmë janë përpjekur të arratisen nga burgu disa herë” dhe do të bëjnë “çdo gjë për të mbetur të lirë”, duke paralajmëruar: “Kur them gjithçka, dua të them gjithçka, përfshirë faktin se jeta njerëzore mund të jetë në lojë këtu”.

Ndërkohë, Herminio Barradas, president i Shoqatës së Shefave të Trupave të Rojeve të Burgut (ASCCGP), e përshkroi grupin si “të pajisur mirë” dhe “të vendosur”, por fajësoi dobësitë në siguri.

Sipas tij, “ka nëntë vjet nuk ka kulla vrojtimi. Kamerat filmuan gjithçka, por nuk kishte aftësi për të reaguar për shkak të mungesës së rojeve të burgut”.

Sipas sindikatave të burgjeve ASCCGP dhe SNCGP, kishte 20 roje në detyrë – gjysma e asaj që do të pritej normalisht – për të mbikëqyrur më shumë se 500 të burgosur.

Por Rui Abrunhosa, drejtori i përgjithshëm i shërbimeve të riintegrimit dhe burgjeve të Portugalisë, e kundërshtoi këtë, duke pretenduar se kishte 33 anëtarë të stafit në detyrë – dhe se rojet e vunë re arratisjen vetëm kur të burgosurit do të ktheheshin në qelitë e tyre – duke shkaktuar një vonesë në alarmimin e autoriteteve të jashtme.

Shërbimi i burgjeve portugeze ka thënë në një deklaratë se është nisur një hetim i brendshëm. /Telegrafi/