Kurti nga Gjermania godet “Ballkanin e Hapur”: Nuk mirëpresim iniciativa që hapin rajonin ndaj fuqive të Lindjes

Pas takimit me kancelarin gjerman Olaf Scholz në Berlin, kryeministri i Kosovës, Albin Kurti, në një konferencë për media, u tregua i ashpër lidhur me iniciativën “Open Ballkan” edhe pse nuk i përmendi fare emrin.

Ai tha se iniciativat rajonale nuk mund të jenë zëvendësim për integrimet në BE, por duhet t’i përshpejtojnë ato.

“Ne e mbështesim Procesin e Berlinit dhe mirëpritem përkushtimin e Kancelarit për të rifilluar këtë proces me një dinamikë të re. Po ashtu ne mbështesim tregun e përbashkët rajonal, i cili ndodhet brenda Procesit të Berlinit dhe rregullave të Bashkimit Evropian. Ai është gjithëpërfshirës, i ka katër liritë. Prandaj edhe nuk mbështesim iniciativa të tjera paralele. Për Kosovën është e rëndësishme që në këtë proces qytetarët të jenë përfituesit më të mëdhenj”, tha ai, përcjell Telegrafi.

Lexo po ashtu Kurti pas takimit me Scholz tregohet i ashpër me BE-në për vizat: Është koha të thuhet se mjaft është mjaft

Kurti thotë se Kosova nuk është kundër iniciativave rajonale kur Bashkimi Evropian paraqitet si vlerë.

Lexo po ashtu Kancelari gjerman: Jemi të angazhuar për liberalizim të vizave për Kosovën

“Iniciativat rajonale që hapin Ballkanin ndaj fuqive nga Lindja apo Verilindja ne nuk i mirëpresim dhe i konsiderojmë të panevojshme. Kosova dhe Ballkani janë të hapura për Bashkimin Evropian dhe NATO-n, janë të hapura për Gjermaninë dhe këto janë mëse të mjaftueshme”, deklaroi ndër të tjera Albin Kurti./Telegrafi/