Rihapja e fitneseve, trajneri Egzon Shkololli rekomandon mënyrën më të mirë se si duhet rikthyer në ushtrime

Me vendimet e reja të marra nga Qeveria e Kosovës, gjegjësisht Ministria e Shëndetësisë, është lejuar rihapja e fitneseve dhe palestrave sportive.

Ato qëndruan të mbyllur për më shumë se dy javë, si masë kufizuese e ndërmarrë nga institucionet për të parandaluar përhapjen e COVID-19.

Trajneri i njohur i fitnesit dhe ‘crossfit’-it, Egzon Shkololli, e quajti të padrejtë vendimin për pezullimin e punës së fitneseve këto dy javë.

“Së pari mbyllja e fitneseve dhe palestrave ishte një vendim i pamenduar dhe shumë drastik. Përderisa lokalet, qendrat tregtare, e shumë biznese tjera punonin, ne pësuam një mbyllje të pa vend. Palestra është vendi ku lufton me ushtrime çdo virus dhe sëmundje tjetër”, ka thënë Egzoni për Telegrafin.

Ai tha se mbyllja shkaktoi mjaftueshëm dëme, pasi dihet që fluksi më i madh i klientëve është këto muaj.

“Mbyllja na dëmtoi mjaftueshëm për të ia filluar nga e para. Fluksi i punës tek ne janë këto muaj. Shpresojmë mos të kemi mbyllje tjetër dhe mos të përballemi me masa të këtij lloji”, shtoi Shkololli.

Megjithatë për të gjithë ata që i janë larguar rutinës së përditshme dhe demotivuar për të nisur ushtrimet nga fillimi, ka një mënyrë rikthimi në ushtrimet e përditshme, sipas trajnerit të njohur.

“Pas këtij pushimi dyjavor mënyra më e mirë për tu kthyer në ushtrime është arsyeja e të menduarit për trupin sa më fit dhe mendjen sa më të shëndoshë. Stërvitja është vet jeta. Është pjesa më e bukur e ditës që ndajmë për veten tonë. Me 45 minuta ushtrime çdo ditë, je larg çdo sëmundje, larg stresit dhe gjërave negative në jetë. Ushtrohu mos e humb asnjë ditë treningu, dembelizmi është për të dobëtit, dhe ti nuk je njëri ndër ta”, ka thënë Egzon SHkololli për Telegrafin.

View this post on Instagram

A post shared by I L L Y R I A N S P O R T S (@illyriansport)