Pesë lojtarët më të shtrenjtë në vitin 2021 të ekipit të Kosovës

Viti 2021 në nivelin individual nuk ka qenë më i miri për disa nga lojtarët më të mirë të Përfaqësueses së Kosovës.

Ajo që bie në sy është rritja e vlerës së Amir Rrahmanit, i cili kishte një vit për ta mbajtur në mend, dukshëm më të mirin në karrierën e tij, ndërsa Vedat Muriqi dhe Milot Rashica nuk mund të mburren shumë për 12 muajt e fundit.

Telegrafi ka analizuar çmimet e secilit lojtarë të Përfaqësueses së Kosovës, duke nxjerrë pesë më të vlefshmit.

Amir Rrahmani

Amir Rrahmani është tani lojtari më i vlefshëm i Kosovës me çmim prej 22 milionë euro në tregun e transferimeve, sipas Transfermarkt, uebsajtit për caktimin e vlerës së futbollistëve në treg.

Kapiteni dhe mbrojtësi i Kosovës iu bashkua Napolit nga Hellas Verona për 14 milionë euro në vitin 2020, dhe që prej atëherë, vlera e tij është rritur për tetë milionë euro.

Paraqitjet e tij mbresëlënëse gjatë pjesës së parë të sezonit 2021/22 në Serie A, duke i ndihmuar Napolit të futet në garë për titull në Serie A që nga fillimi i kampionatit, kanë luajtur rol kryesor në rritjen e vlerës së tij.

Rrahmani i bëri 17 paraqitje për Napolin në të gjitha garat gjatë pjesës së parë të këtij sezoni. Ai u zgjodh “Lojtari më i Mirë i Vitit 2021” i Kosovës nga Federata e Futbollit e Kosovës.

Milot Rashica

Megjithëse Rashica u largua nga Werder Bremen në verë, një klub që e nisi sezonin e ri në kategorinë e dytë të futbollit gjerman, për t’iu bashkuar Norwich Cityt në Ligën Premier – vlera e tij në treg ka rënë në 8 milionë euro.

25-vjeçari iu bashkua Norwichit nga Werderi në një marrëveshje prej 11 milionë eurove në korrik.

Nëse e krahasojmë vlerën e tij më të madhe në treg, 35 milionë euro në dhjetor 2019, me vlerën e tanishme, atëherë vlera e tij ka rënë tmerrësisht; për 28 milionë euro, pavarësisht se mund të argumentohet se Rashica ka shënuar përparim në karrierë duke kaluar nga Bundesliga në Ligën Premier.

Ai i ka bërë 13 paraqitje në ligë për Norwichin deri tani por e pësoi lëndim muskulor tamam kur fitoi ta gjente formën e vet më të mirë.

Vedat Muriqi

Njëlloj si bashkëlojtarit të tij te Kosova, edhe Muriqit i ka rënë vlera në treg dhe ai kushton edhe më lirë se Rashica, vetëm 6 milionë euro nga 29 dhjetori 2021.

Sulmuesi prizrenas i kushtoi Lazios 19 milionë euro kur u ble nga Fenerbahce në shtator 2020 dhe vetëm një muaj më vonë vlera e tij në treg ra në 17 milionë euro.

Një vit më vonë dhe vlera e 27-vjeçarit pësoi rënie edhe më të madhe, prej 11 milionë eurove. Rënia e tij e madhe është e kuptueshme kur merret parasysh fakti se Muriqi i ka luajtur vetëm 206 minuta futboll në Serie A në këtë pjesë të parë të sezonit 2021/22, duke e dhënë një asist por asnjë gol.

Por Muriqi tregoi formë të mirë me Kosovën në kualifikime për Kupën e Botës 2022, duke i shënuar tri gola në tetë ndeshje gjatë këtij viti.

Mërgim Vojvoda

Mbrojtësi anësor i Torinos, ka një vlerë në treg rreth 4.5 milionë euro.

Një futbollist që luan shpesh te Torino në Serie A, ku madje edhe prej kalimit të tij në Itali, ka zhvilluar plot 36 ndeshje, ku ka kontribuuar me  2 gola dhe 3 asistime.

Ai edhe te Kosova është një pikë reference ku nuk mungon në asnjë ndeshje.

Arbër Zeneli dhe Florent Hadërgjonaj

I pesti në listë sa i përket vlerës te Kosovës është anësori i Reims, Arbër Zeneli.

Sulmuesi edhe pse ka qëndruar i lënduar për një kohë të gjatë, ai vazhdon të ketë një çmim që vlen miliona euro.

Vlera e Zenelit llogaritet diku rreth 4 milionë euro.

Vlerë të njëjtë ka edhe mbrojtësi i Kasimpasa, Florent Hadërgjonaj.

Edhe ky një pikë referuese për Kosovës, ndërsa edhe tek klubi i tij luan në çdo ndeshje. /Telegrafi/