Direkt nga burgu i Idrizovës flet Naser Baraliu i Grupit të Kumanovës: Nuk erdha këtu për ta vrarë Ali Ahmetin

Vehbi Kajtazi në “Debat Plus” e kishte quajtur bandë kriminale “Grupin e Kumanovës” derisa po diskutohej për debatin parlamentar në Kuvendin e Kosovës.

Kjo deklaratë e Kajtazit ka ngjallur debate në shoqëri në lidhje me ngjarjet e vitit 2015 në Kumanovë ku u vranë shumë persona e gati 50 shqiptarë tjerë tashmë gjenden në burg.

Naser Baraliu i dënuar me burgim të përjetshëm në Maqedoni për ato ngjarje, derisa është duke pritur rastin në Supreme është lidhur me video në “Debat Plus” për të diskutuar për këtë çështje.

“Nuk kam shumë dëshirë të dal në televizor por jam i detyruar ta kryejë detyrën. Pse gazetari në fjalë del me deklarata pikërisht tash kur ne po presim vendimin e Gjykatës së Apelit”, tha ai, përcjell Telegrafi.

Ai thotë se në Kosovë ka shumë njerëz që mendojnë se Kosova nuk kanë mundur të çlirohet nga Serbia.

“Ai ma ka akuzuar se unë kam ardhur në Maqedoni për të vrarë Ali Ahmetin. Unë iu them të gjithëve se nuk kam barut për shqiptarë. Pse është dashur që neve 10 veta të në hyjnë në varr e 33 tjerë në burg për të vrarë një person. Atë ka mundur ta bëjë vetëm një person. Unë nuk fshehëm nëse vrasë dikë, dhe e bëjë atë në emër të popullit”.

Baraliu thotë se ka qenë në shtëpi kur e kanë thirrë “eja se po kris lufta në Maqedoni”.

“Iu kam thënë më pritni vetëm një jakne ta marr edhe jam nisur…Unë nuk kam faj pse kam mbetur gjallë”.

Naser Baraliu dhe disa të burgosur tjerë janë të vendosur në burgun e Idrizovës, derisa pjesa tjetër e të burgosurve shqiptarë janë në burgun e Shutkës./Telegrafi/