Analiza e mediumit spanjoll për ekipin e Kosovës: Lojtarë që luajnë jashtë, Thaqi i vetmi ‘puro’ vendor

Mediumi i njohur spanjoll Marca ka bërë një seri shkrimesh për Kosovës, para ndeshjes me Spanjën, duke e analizuar edhe listën e ekipit tonë.

Duke u bazuar në listën zyrtare të publikuar nga FFK, aty gjendet vetëm Armend Thaqi, nga lojtarët që luajnë në kampionat vendës (së fundmi është ftuar edhe Muharrem Jashari i Dritës, por nuk ka patur njoftim zyrtar nga FFK).

“Armend Thaqi (I lindur në Prishtinë, 10-10-1992). Ai është futbollisti i vetëm i kësaj përzgjedhjeje të fundit, që nuk e ka lënë kurrë vendin e tij, duke luajtur gjithmonë në Kosovë. Ndër 23 të thirrur nga zvicerani Bernard Challandes, Kosova formon një hartë të Evropës, pasi ka nga katër lojtarë që luajnë në skuadrat italiane dhe zvicerane, tre nga kampionatet turke, dy nga Ligue 1, dhe nga një në Ligën Premier, Polonia, Suedia, Hungari, Shqipëria, Gjermania, Holanda, Letonia dhe Norvegjia.

Armend Thaqi, ylli i Superligës së Kosovës

Flamuri i vetëm i Kosovës që ishte në listë nga fillimi i këtij tubimi,  është lojtari i FC Ballkanit, klub me seli në Suharekë, një qytet që ka rreth 60,000 banorë. Sezonin e kaluar ky klub u rendit i treti në fund të edicionit të Superligës së Kosovës.

Armend Thaqi, i cili zë pozicione në krahun e djathtë si mbrojtës, mund të luajë edhe në qendër, filloi të spikatet në futbollin vendor në vitin 2013 në radhët e Hajvalisë, nga ku kaloi nga Prishtina.

Në vitin 2016 ai ishte i lirë dhe kaloi në klubin e Gjilanit, qytet afër kufijve të Kosovës me Serbinë dhe Maqedoninë. Atje, Thaqi u bë mbrojtësi i djathtë më i mirë në Superligë, gjë që bëri që ai të kthehej në Prishtinë, por në verën e vitit 2020 u largua përsëri. Klubi për të marr në radhët e vetë i ka kushtuar 250 mijë euro.

Nga të gjithë të ftuarit që kanë luajtur vetëm me Kosovën, janë tre

Astrit Selmani pret debutimin me Kosovën, por nuk ka luajtur kurrë me asnjë kategori të grupmoshave në vendin e tij.

Nga të ftuarit vetëm Armend Thaqi, Florian Loshaj dhe Lirim Kastrati kanë luajtur vetëm me fanellën e Kosovës. Të tre ishin në U21 dhe tani në ekipin A. Kastrati luajti edhe te U 19.

20 lojtarët e tjerë në skuadrën aktuale kanë ndeshje në të kaluarën edhe me kombëtare të tjera. Ka nga ata që erdhën për të luajtur nga ekipi A i Shqipërisë (Samir Ujkani, Amir Rrahmani, Milot Rashica dhe Herolind Shala) ose nga Norvegjia (20 ndeshjet me këtë kombëtare).

Ndërsa të tjerë janë të formuar në vende si Gjermania, Suedia, Norvegjia, Zvicra, Shqipëria dhe Mali i Zi.

Një rast i rrallë është ai i Herolind Shalës, që ka veshur fanellën e tre vendeve. E para që e thirri ishte Norvegjia, vendi i tij i lindjes, ku luajti për U17 dhe U21.

Në atë kohë ai vendosi të ndryshojë kombëtare duke luajtur për Shqipërinë U21 vjeç dhe ekipin e të rriturve pastaj. Më 6 tetor 2016, ai debutoi me Kosovën.

Kosova, lindi në vitin 1942 kur e zhvilloi ndeshjen e parë

Më 3 maj 2016, UEFA njohu Kosovën si anëtare të plotë. Menjëherë pastaj edhe  FIFA. Më 5 mars 2014, me Haitin (0-0) si rival, Kosova luajti ndeshjen e parë që është regjistruar si ndeshje zyrtare në arkivat e FIFA-s në Cyrih.

Ndeshja kundër Spanjës sot do të jetë numri 55 që atëherë. Por më parë. Kosova kishte edhe 13 ndeshje të tjera të paregjistruara, shkruan Marca.

E para nga të gjitha u luajt më 29 nëntor 1942, në Tiranë.

Ishte në përkujtim të 30 vjetorit të Pavarësisë së Shqipërisë.Formacioni: Daci, Ballanca, Zaimi, Xerxa, Veseli, Hamza, Dylatahu, Vraniqi, Barbarogiq, Bajrami dhe Henci. Ky ishte ekipi i Kosovës që humbi në Tiranë nga një ekip B nga Shqipëria.

Në epokën komuniste, Kosova mori pjesë në 1975 në një turne të quajtur vëllazëria, në të cilën disa nga republikat e ish-Jugosllavisë u përballën me njëra -tjetrën. Ata fituan të gjitha ndeshjet e tyre: Mali i Zi 2-0, Bosnje-Hercegovina 2-1, Sllovenia 2-0 dhe Maqedonia 1-0.

Në total, ishin 13 ndeshje. Njëri prej tyre, më 8 nëntor 1967, u luajt në Prishtinë kundër Jugosllavisë: 3-3.

Pas luftës, më 7 shtator 2002, Shqipëria vizitoi Prishtinën. Ekipi kosovar po fillonte të kthehej në jetë. /Telegrafi/