Shënohet përvjetori i gjashtë i vrasjes së kritikut të Kremlinit, Boris Nemtsov

Disa mijëra rusë dhe diplomatë perëndimorë bënë homazhe në një urë të Moskës ku politikani i opozitës Boris Nemtsov u qëllua për vdekje gjashtë vjet më parë.

Nemtsov ishte një nga kritikët më të zëshëm të presidentit aktual rus Vladimir Putin derisa u vra në një urë afër Kremlinit më 27 shkurt 2015.

Përvjetori i gjashtë i vrasjes së tij vjen menjëherë pasi kritiku aktual më i zëshëm i Kremlinit, Alexei Navalny u dërgua në një burg për ta vuajtur dënimin gati tre-vjeçar, gjë që ai e quan si të motivuar politikisht.

Siç raportojnë mediet ruse, përvjetori zakonisht shënohet me anë të një marshi përmes Moskës, por qytetarët rusë dhe diplomatët perëndimor zgjodhën të mblidheshin këtë vit në memorialin e improvizuar, i cili çdo herë demolohet nga autoritetet.

Юлия Навальная возложила цветы к месту гибели Бориса Немцова. От комментариев она воздержалась pic.twitter.com/3R4pgXxPxQ

— DW на русском (@dw_russian) February 27, 2021

“Ne bashkohemi në këtë vend çdo ditë për t’u treguar autoriteteve se nuk kemi harruar dhe nuk do të harrojmë. Unë jam i sigurt se ajo për të cilën Boris luftoi – liria për rusët, mirëqenia e tyre dhe një jetë tw dinjitetshme – do të vijë së shpejti”, u tha ish-kryeministri dhe politikani i opozitës Mikhail Kasyanov gazetarëve gjatë homazhit.

Në vitin 2017, një gjykatë e shpalli një ish-oficer të forcës së sigurisë nga Çeçenia fajtor për vrasjen e Nemtsovit dhe e dënoi atë me 20 vjet burg. Katër persona të tjerë u gjetën fajtorë për përfshirje në vrasje. /Telegrafi/