Sa është klauzola e Messit dhe sa do të kushtonte në rast se Barca vendos ta shesë

Nëse ndonjë klub dëshiron ta transferojë Lionel Messin, atëherë duhet ta aktivizojë klauzolën për shkëputjen e kontratës së tij – por cila është ajo?

Është vështirë ta imagjinosh superyllin argjentinas duke bartur fanellën e një klubi tjetër, mirëpo spekulimet vetëm sa po intensifikohen lidhur me largimin e mundshëm nga Katalunia.

Pas sezonit zhgënjyes që patën Blaugranët, e sidomos pas humbjes turpëruese nga Bayern Munichu në Ligën e Kampionëve, 33-vjeçari është duke e menduar seriozisht largimin, duke qenë se e kishte paralajmëruar menaxhmentin e klubit se skuadra kishte nevojë për ndryshime.

Ai ka kontratë me Barcën deri në verën e ardhshme (2021), ndërsa nuk ka pranuar që ta rinovojë kontratën. Kjo u jep mundësi klubeve që të nisin bisedimet me të në muajin janar për ta transferuar pa para në fund të sezonit të ardhshëm.

Lexo po ashtu Dilema më e madhe në karrierën e Messit

Për këtë arsye, katalunasit duhet ta shesin atë që të mos e humbin pa para në verën e vitit 2021.

Klauzola për shfuqizimin e kontratës së Lionel Messit

Messi ka një klauzolë blerëse për prishjen e kontratës në vlerë prej 700 milionë eurosh. Kjo pikë është përfshirë në marrëveshjen katërvjeçare, të cilën sulmuesi e nënshkroi me Barcelonën në vitin 2017 dhe që është valide deri në vitin 2021.

Lexo po ashtu Takimi Messi-Koeman, argjentinasi e njofton trajnerin se e sheh veten më shumë larg Barcës

Para kësaj, klauzola e argjentinasit kishte qenë 300 milionë euro. Mirëpo, kur Paris Saint-Germaini ia pagoi klauzolën prej 222 milionë eurosh Neymarit, klubi spanjoll vendosi që t’ia rinovonte kontratën dhe të vendoste klauzolë të re për futbollistin kryesor të skuadrës në dekadën e fundit.

Nëse një klub do të dëshironte ta blinte fituesin e gjashtëfishtë të Topit të Artë, do të duhej të ofronte 700 milionë euro, ndërsa Barca do të ishte e detyruar ta pranojë këtë ofertë.

Megjithatë, duke marrë parasysh se mosha ka të njëjtin efekt edhe te Messi si te gjithë të tjerët, si edhe kur kihet në konsideratë se ka vetëm një vit në kontratën e tij, nëse ai e kërkon largimin – atëherë Barcelona do të detyrohej të pranonte një ofertë shumë më të ulët se kontrata e tij, në mënyrë që të mos e humbte me parametrat zero një vit më pas.

Klubet që mund ta transferojnë Messin

Nuk ka dyshim se çdo klub në botë do ta dëshironte Leo Messin në skuadër, mirëpo një numër i vogël prej tyre mund ta përballojë transferimin e tij. Edhe nëse Barca e lejon largimin e tij pa para, paga e madhe e argjentinasin përzgjedh një listë të ngushtë të klubeve që mund ta angazhojnë.

Manchester City, Interi, Juventusi dhe Paris Saint-Germaini janë destinacionet potenciale të superyllit të futbollit. Citizens që drejtohen nga Pep Guardiola, kanë një përparësi më të madhe për shkak të bashkëpunimit të mëhershëm të tyre.

Lexo po ashtu Inter, Manchester City dhe PSG: Opsionet e Messit nëse ai largohet nga Barcelona

Ndërsa në muajt e fundit, Interi ka qenë klubi që është lidhur më së shumti me Messin, edhe pse te Barcelona vazhdojnë të shpresojnë në qëndrimin e tij.

Çfarë është klauzola e blerjes apo lirimit të një lojtari

Në futboll, klauzola e blerjes që shpesh referohet si klauzola e lirimit – është një klauzolë në kontratën e futbollistit që përfshin një çmim të caktuar transferimi, që në rast se paguhet, klubi e ka për detyrë që ta pranojë.

Shuma zakonisht caktohet shumë më lartë se sa çmimi real i lojtarit në treg, në mënyrë që të qëndrojë si pengesë për ofertuesit e mundshëm, por ka raste kur është relativisht e ulë, ashtu që t’i tërheqë blerësit potenciale.

Klauzolat blerëse kanë qenë aspekte të detyrueshme në kontratat e futbollistëve në Spanjë që nga viti 1985.

/Telegrafi/