Arrestohen dy serbë për kontrabandim me mallra në Gjilan, njëri prej tyre është zyrtar policor

Policia e Kosovës ka njoftuar se gjatë patrullimit në rajonin e Gjilanit, ka hasur në dy persona të dyshuar të cilët në furgonin e tyre kishin ngarkuar një sasi të mallrave të kontrabanduara.

Në njoftimin e bërë për media thuhet se më datë 21.11.2019, Policia e Kosovës ka ndaluar një furgon me targa vendore të cilin e drejtonte njëri nga dy të dyshuarit, transmeton Telegrafi.

“Pas kontrollimit të këtij furgoni është vërejtur se në të kishte të ngarkuar rreth 40 arka birra, një komplet qumësht dhe një sasi e çokollatave ku vlera e këtij malli sipas njërit nga të dyshuarit sillet rreth 400 euro.  Në lidhje me rastin, personat e dyshuar të arrestuar janë, Zh. R i lindur më 1962 M /Kosovar/Serb G. S i lindur më 1972 M /Kosovar/Serb”, thuhet në njoftim.

Policia bën të ditur se personat e lartcekur janë shoqëruar në stacion policor ku njëri nga të dyshuarit e përfshirë në rast është pjesëtar i Policisë së Kosovës, dhe me këtë rast është njoftuar edhe IPK-ja (Inspektorati Policor i Kosovës) të cilët kanë bërë intervistimin e të dyshuarit (zyrtar policor) të përfshirë në rast.

‘Hetuesit e IPK-së kanë dalë në vendin e ngjarjes, është kontaktuar prokurori i shtetit me vendim të të cilit të dyshuarve të arrestuar u është caktuar masa e ndalimit për 48 orë”, thuhet në njoftim.

Policia bën të ditur se furgoni si dhe malli i dyshuar për kontrabandim është sekuestruar deri në përfundimin e procedurave të parapara me Kodin e Procedurës Penale./Telegrafi/