​Partitë e vogla shpallin paktin zgjedhor anti-Brexit

Tre parti të vogla politike britanike njoftuan sot një pakt zgjedhor në përpjekje për të siguruar më shumë anëtarë të parlamentit që mbështesin qëndrimin në Bashkimin Evropian.

Liberal-demokratët kundër Brexit-it, u bashkuan me Partinë e Gjelbër dhe partinë nacionaliste të Uellsit “Plaid Cymru”, në një marrëveshje bashkëpunimi për rreth 60 nga 650 vendet në parlament, në zgjedhjet e 12 dhjetorit, gjë që do të thotë se vetëm një kandidat nga tre partitë do të qëndrojë në secilën zonë elektorale.

“Jam i kënaqur që arritëm të publikojmë këtë marrëveshje për t’u siguruar që të marrim sa më shumë deputetë të jetë e mundur kundër largimit nga BE”, shkroi në Twitter kreu liberal-demokrat, Jo Swinson.

Partia e Gjelbër deklaroi se pakti do t’i japë mundësinë të kandidojë  për 10 vende në të gjithë Anglinë dhe Uellsin.

“Partia jonë do të vendosë të parin interesin kombëtar të Uellsit, duke lënë politikën e partisë mënjanë për të fituar sa më shumë deputetë të jetë e mundur nga partitë kundër Brexit-it”, deklaroi udhëheqësi i partisë Plaid Cymru, Adam Price./ATSH/