Dilema e madhe e Valverdes te Barcelona: Arthur, apo Arturo?

Barcelona, ​​kishte epërsinë numerike ndaj Gironas, por po humbiste në posedimin e topit në disa momente, kështu që Ernesto Valverde vështroi stolin dhe e ndërroi Arturo Vidalin me Arthurin.

Kontrolli i lojës me brazilianin në fushë është më i lehtë, por ka ende dilema në atë pozicion se kush do të luajë.

Kush do t’i luajë ndeshjet e rëndësishme kur Barcelona lufton për tituj? Vetëm Valverde e di përgjigjen.

I kemi parë dyshen së bashku në fushë, veçmas dhe duke e zëvendësuar njëri-tjetrin, kështu që trajneri i ka provuar të gjitha kombinimet.

Ndonjëherë për zgjedhje, nganjëherë për shkak të rotacionit dhe nganjëherë për shkak se duhej ta bënte, por Valverde i ka zëvendësuar të dy lojtarët shpesh.

Arthur e nisi si titullar i padiskutueshëm sezonin, ndërsa Vidal kishte një vend në bankën rezervë, dhe nuk kalonte mirë me trajnerin që i kishte ndarë pak minuta.

Situata mori një kthesë të papritur dhe kilian, duke përfituar nga një dëmtim i vogël i brazilianit, u zhvendos në ekipin e parë.

Tani numrat e tyre në minuta janë pothuajse të ngjashme në ligë, ndërsa Arthur ka më shumë rëndësi në Ligën e Kampionëve, e  Vidal në Copa del Rey.

Me Sergio Busquets dhe Ivan Rakitic, me vende të sigurta në mes, Philippe Coutinho ‘lufton’ me Ousmane Dembele për një vend në sulm, ndërsa ‘Arthurs’ do të luftojnë për pozicionin e vetëm të lirë në ekip dhe ende nuk duket e qartë se kush do ta fitojë.

Vidal zakonisht luan më shumë ndeshjet jashtë fushës me Arthur që luan më shpesh në shtëpi.

Kilian ka dy gola dhe tre asistime deri më tani këtë sezon, krahasuar me një asistim  të vetme nga braziliani.

Arthur është ai që drejton statistikat për rikuperimin e topit, duke e rikuperuar 99 herë, krahasuar me 81 herë për ish-lojtarin e Bayern Munichu.

Ata janë lojtarë të ndryshëm me stile të ndryshme dhe sjellin dy opsione për një pozicion të vetëm.

Cili do të zgjidhet në pjesën vendimtare të sezonit? Këtë e di Valverde. /Telegrafi/