Juve e mposht Lazion me përmbysje në Olimpico

Juventusi është kthyer nga disavantazhi për ta mposhtur Lazion (2-1) në Stadio Olimpico, në ndeshjen e vlefshme për javën e 21-të në Serie A.

Skuadra vendase ka bërë lojë fantastike në pjesën e parë duke e rrezikuar vazhdimisht portën kundërshtare, mirëpo nuk arriti ta gjente rrjetën.

Wallace, Marco Parolo e Ciro Immobile, janë disa prej futbollistëve që e testuan Wojciech Szczesnyn, por portieri mysafir bëri disa pritje të mrekullueshme.

Nikoqirët vazhduan të luanin më mirë edhe në minutat e para të gjysmës së dytë dhe pas një aksioni, rezultati u zhbllokua përmes një autogoli të Emre Can (59′).

Biancocelestët vazhduan të luanin mirë dhe rrezikuan sërish përmes Ciro Immobile dhe Luis Alberto, por derisa minutat po kalonin, rrjedha e lojës ndryshoi.

Inkuadrimi i Joao Cancelos në lojë ndryshoi gjithçka. Mbrojtësi i krahut e barazoi rezultatin (78′) pas një topi të kthyer nga goditja e Paulo Dybalas.

Pikërisht një ndërhyrje në Cancelon në zonë, gjyqtari e ndëshkoi me penallti, ndërsa Cristiano Ronaldo u tregua i saktë nga pika e bardhë (88′).

Juventusi vazhdon të jetë lider i pakontestueshëm në Serie A me 59 pikë, 11 pikë më shumë se përcjellësi i parë, Napoli.

Lazio pozicionohet në vend të tetë në tabelë me 32 pikë të arkëtuara nga nëntë fitore, pesë barazime dhe shtatë humbje.

Në xhiron e ardhshme, Zonja e Vjetër luan kundër Parmas, ndërsa kryeqytetasit kanë për kundërshtar Frosinonen. /Telegrafi/

https://www.dailymotion.com/video/x71d9zd

https://www.dailymotion.com/video/x71dai5