Pakënaqësia për situatën e tij te Unitedi, u vërejt në fytyrën e Pogbas pas golave të Shaqirit

Paul Pogbas dukej “i çoroditur” në bankën rezervë të Manchester Unitedit duke shikuar humbjen e skuadrës së tij (3-1) në derbin e të dielës nga Liverpooli – shkruan express.co.uk.

Francezi nuk luajti në Anfield, pasi trajneri Jose Mourinho vendosi për një mesfushë më defensive me dyshen Nemanja Matic dhe Ander Herrera.

Pas pjesës së parë, u inkuadrua një tjetër mesfushor, por trajneri zgjodhi Marouane Fellainin dhe jo lojtarin më të shtrenjtë në histori të klubit.

Në atë kohë, rezultati ishte i barabartë, mirëpo në minutën e 70-të, Jurgen Klopp e inkuadroi në lojë mesfushorin shqiptar, Xherdan Shaqiri, i cili e ndryshoi tërësisht rrjedhën e lojës.

Lexo po ashtu Të gjitha lajmet për POGBAN

Vetëm tri minuta pasi hyri në fushë, ai e dërgoi topin në rrjetën e David De Geas. Pasi e xhiruan shpërthimin e Kloppit, kamerat e Sky Sports u kthyen në bankën rezervë të Djajve të Kuq.

Pogba ndodhej në mes të Phil Jones dhe Juan Matas, ndërsa mimika në fytyrën e tij është sjellë në qendër të vëmendjes nga mediat britanike.

Pas golit, Mourinho inkuadroi Anthony Martialin dhe më pas Matan, por Shaqiri e shënoi edhe një gol tjetër, për t’i dhënë fund dilemës për fituesin e kësaj sfide.

Mesfushori francez po kalon një sezon të vështirë nën drejtimin e trajnerit portugez, ashtu që kanë nisur spekulimet se ai mund të largohet që në afatin kalimtar të janarit.

Madje, një kthim i tij te Juventusi tashmë po diskutohet me agjentin e tij, Mino Raiola. /Telegrafi/