Fshati Verboc i Drenasit, vend i shumë shpellave (Video)

Njihet ndryshe si vend i shpellave, sepse në të gjendën një numër i madh i tyre.

Ndërsa më e veçanta mbetet shpella e ariut.

Ajo ndodhet pak metra larg shtëpisë së Muhamet Kastratit banor i fshatit Verboc, të Komunës së Drenasit.

Ai ka thënë se dikur kjo shpellë ishte vend i shumë arinjve, andaj edhe i ka mbet emri i tillë.

“Është thënë nga të parët se në këtë shpellë kanë qëndruar arinjtë. Diku në vitin 1948 është liruar vendi, disa dru të mëdhenj i kam hasur edhe unë. Gjatë luftës dhe para Luftës së Dytë Botërore këtu janë fshehur edhe çetnikët serbë”, deklaroi Muhamet Kastrati për RTV Dukagjinin.

Me një histori interesante, të përcjellë gjeneratë pas gjeneratë, kjo shpellë mbetet ndër ato që zgjojnë më së shumti kërshërinë e gjithë vizitorëve.

Kastrati ka thënë se vijnë nga qytete të ndryshme për ta vizituar atë.

“Çdokush që vjen në këtë fshat iu intereson ky vend dhe vijnë e bëjnë fotografi për shkak të vendit të bukur”, tregon më tej Muhamet Kastrati.

“Shpella e ariut”, mbetët më e vizituara nga nxënësit e këtij fshati.

15 vjeçarja, Samire Shala, banore e këtij fshati, ka thënë se është vendi ku mbledh gjithë shoqërinë.

“Vij shumë shpesh te “Shpella e arushës”. Më pëlqen se është ambient shumë i pastër. Vij këtu me shoqe por edhe me familjarë shumë shpesh”, thotë banorja e këtij fshati Samire Shala.

Po të hipësh lart mbi shpellë, shihet një pamje mahnitëse të fshatit.

Ndërsa për shkak të lartësisë mbidetare, ajri aty është shumë i freskët.

Edhe Ron Kastrati  vjen çdo ditë tek shpella, ka thënë se kalon mjaftë kohë në këtë vend.

“Vij shumë shpesh këtu me shokë më pëlqen të ngjitem në majat të bjeshkëve. Nuk kam parë dhelpra sepse kur vijnë këtu njerëzit ato largohen”, thotë Ron Kastrati.

Verboci njihet si fshat i shpellave. Muhamet kastrati, ka thënë se në këtë vend ekzistojnë 4 të tilla, që presin të eksplorohen. /Telegrafi/