Drita rikthehet te fitorja, ndeshja e 27-të pa humbje për bardh e kaltërtit

Drita ka marrë një tjetër fitore në kampionat ku kësaj radhe kanë mposhtur lehtësisht Lirinë 3-0

Drita e nisi mirë ndeshjen ku rrezikonte vazhdimisht.

Kastriot Rexha fillimisht rrezikoi por pa sukses duke shpëtuar Bakaj Lirinë.

Rexha u largua nga loja pasi pësoi një lëndim duke thyer hundën.

Rastin më të mirë në pjesën e parë për Dritën e pati Haxhi Neziraj që doli përballë portierit Bakaj por që dështoi të shënoi.

Me rezultatin e barabartë 0-0 përfunduan 45 minutat e para të kësaj sfide.

Pjesa e dytë nisi edhe më mirë për vendasit që vazhdimisht rrezikonin.

Përparim Livoreka pati rastin e parë por dështoi nga afërsia ta dërgonte topin në rrjetë.

Në minutën e 53-të erdhi goli i parë në stadiumin e qytetit në Gjilan kur Leutrim Kryeziu shënoi nga distanca për 1-0.

Drita vazhdoi dominimin por për golin e dytë u desh të pritej minuta e 84-të kur realizoi Përparim Livoreka.

Në minutën e 83-të, Haxhi Neziraj arriti të shënonte golin e tretë në këtë takim duke konfirmuar fitoren e thellë të Dritës.

Drita vazhdon të mbetët në pozitën e parë me 63 pikë të tubuara, tri më shumë se Prishtina.

Ndërkohë Liria ndodhet në pozitën e gjashtë në tabelë me 47 pikë.

Në ndeshjen e ardhshme, Drita do të përballet me Trepçën ’89 përsëri në stadiumin e qytetit në Gjilan.

Ndërkohë Liria do të përballet me Prishtinën në Përparim Thaçi në Prizren. /Telegrafi/