Reali e nis mbarë mbrojtjen e titullit të La Ligas (Video)

Real Madridi i ka arkëtuar tri pikët e para në sezonin 2017/2018 në kampionatin spanjoll. Los Blancos fituan me rezultat 3-0 si mysafirë të Deportivo La Corunas në Estadio Riazor.

Goli i parë u shënua në minutën e 20-të kur Gareth Bale reagoi më së miri në zonë dhe e dërgoi topin në rrjetë.

Shumë shpejt u realizua edhe goli i dytë nga vizitorët. Vendasit gabuan sërish dhe Casemiro e dyfishoi epërsinë (27’). Me epërsi prej dy golash për mbretërit, skuadrat shkuan në pushim.

Loja e mirë e të zgjedhurve të Zinedine Zidane vazhdoi edhe në pjesën e dytë, në të cilën shënuan sërish.

Një aksion shumë i bukur me pasime, i nisur nga Karim Benzema u vazhdua nga Isco, i cili pasoi te Gareth Bale. Uellsiani krijoi hapësire dhe asistoi te Toni Kroos që ndodhej në qendër dhe goditja e tij u ndal në rrjetë (62’).

Në minutat në vazhdim pati edhe raste të tjera shënimi, mirëpo munguan golat tjerë.

Një ndërhyrje të Carvajal në zonë, gjyqtari e ndëshkoi me penallti, ndërsa Florin Andone u tregua i pasaktë nga pika e bardhë, duke dështuar ta shënonte golin e nderit për vendasit (89’).

Në minutat shtesë, kapiteni Sergio Ramos u përjashtua me kartonin e dytë të verdhë, ashtu që do t’i mungojë skuadrës në ndeshjen e radhës.

Real Madridi iu gëzua fitores së parë sezonale në La Liga dhe kështu e nis në mënyrën më të mirë mbrojtjen e titullit të kampionit në Spanjë. /Telegrafi/

https://www.dailymotion.com/video/x5xib60

http://www.dailymotion.com/video/x5xid1p

https://www.dailymotion.com/video/x5xifch