Ronaldo: Nuk më shqetësojnë kritikat, kam luajtur futboll për 18 vite

Cristiano Ronaldo ka shpërfillur kritikët që e kanë cilësuar Manchester Unitedin si ekip të “dobët” javët e fundit, duke thënë pas fitores 3-0 kundër Tottenhamit të shtunën se ai kurrë nuk u interesua për perceptimin publik të ekipit.

Goli dhe asistimi i tij kundër Spurs ndihmuan në lehtësimin e presionit mbi skuadrën e Ole Gunnar Solskjaer pas humbjes 5-0 të fundjavës së kaluar ndaj Liverpoolit në Old Trafford.

Megjithatë, Djajtë e Kuq mbeten në një territor të pakëndshëm në Ligën Premier me ambiciet e tyre për titullin një ëndërr të largët për shkak të një muaji përgjithësisht zhgënjyes.

Lexo po ashtu Man Utd fiton thellë derbin e javës në udhëtim ndaj Tottenhamit

“Kritikat janë gjithmonë aty. Për mua, nuk më shqetëson sepse kam luajtur 18 vite futboll, kështu që e di që një ditë njerëzit do të thonë ne jemi perfekt dhe një ditë do të thonë ne jemi katrahurë”, ka thënë fillimisht Ronaldo për faqen zyrtare të klubit.

“Unë e di këtë dhe ne duhet të merremi me këtë, por është gjithmonë më mirë kur njerëzit të lavdërojnë dhe ata janë të kënaqur me ty”.

“Ndonjëherë jeta është e tillë, ndonjëherë duhet të kalojmë momente të këqija dhe duhet të ndryshojmë dhe ndryshuam sot (e shtunë)”.

Lexo po ashtu Solskjaer: Fitorja ndaj Tottenhamit nuk do të thotë se humbja kundër Liverpoolit mund të harrohet

“Ekipi ishte pak nën presion, pak i trishtuar, por ne e dinim që mund të jepnim një përgjigje të mirë. Ne luajtëm mirë, e filluam lojën shumë mirë”.

“Sigurisht që detyra ime është të ndihmoj ekipin me përvojën time, golat e mi, asistimet e mia dhe këtë e bëra sot dhe ndihem shumë i kënaqur me këtë. Por sa i përket ekipit, për mendimin tim ishte një paraqitje e pabesueshme”, përfundoi ylli portugez. /Telegrafi/