Regjistrimi i popullsisë hap 7 mijë vende pune

Regjistrimi i ri i popullsisë do të hapë rreth shtatë mijë vende pune të përkohshme. Të punësuarit e rinj do të kenë një vend pune deri në mbarimin e fazës së regjistrimit të popullsisë që parashikon të bëhet derë më derë ku çdo individ do të plotësojë një formular dhe për herë të parë do të publikojë edhe besimin fetar apo përkatësinë etnike.

Sipas gazetës Shekulli, projekti do të zgjasë 6 muaj dhe shtatë mijë punonjësit do të kenë një fond pagash prej 90 milionë lekësh të reja, ndërkohë që e gjithë kostoja do të jetë rreth 15 milionë euro.

Shteti do të paguajë 5 milionë euro, ndërsa shpenzimet e tjera do të mbulohen nga organizata si IPA me 8 milionë euro, UNFPA me 1 milion, si dhe financime të tjera të UNDP dhe statistikat suedeze.Vendimi për regjistrimin e popullsisë mbi baza etnike është kundërshtuar fuqimisht nga shoqëria civile dhe historianët për shkak se është një projekt që mbështet idenë greke për një numër të madh minoritarësh në Shqipëri.

"Të gjithë ata që marrin pensione nga Greqia kanë ndryshuar dokumente për ndërrimin e kombësive ose edhe ata që kanë dashur një vizë pune apo kanë dashur të shkojnë të punojnë diku, kanë bërë të gjithë këtë gjë. Tani, dikush përpiqet nga Greqia ta nxisë këtë, për të thënë më në fund se në Shqipëri ka minoritet përtej asaj që është në vërtetë dhe që ka më shumë njerëz të kombësisë greke, nga ç’ka në të vërtetë", është shprehur historiani Sabri Godo. /Telegrafi/