Reagimi i MPJD-së ndaj Rusisë vlerësohet joserioz dhe me anglishte të dobët

Reagimi i Ministrisë së Punëve të Jashtme dhe Diasporës lidhur me rrëmbimin e aeroplanit në Bjellorusi dhe arrestimin e një gazetari disident, ka ngjallur debat në opinionin publik.

E para, pasi mënyra e shkruar në gjuhën angleze lë për të dëshiruar.

Rënditja e gabuar e fjalive, ka ngritur dyshime te përdoruesit e kësaj platforme se ministria ka përdorur shërbimin e Google për përkthim “google translate” për shkrimin e këtij statusi.

Po ashtu, ky postim po konsiderohet jodiplomatik dhe joserioz.

Ish-zëvendësministrja e Jashtme e Kosovës Teuta Sahatqija ka thënë se postimi është me plot gabime në gjuhën angleze dhe se me këtë është bërë horë shteti i Kosovës.

“Si ta komentoj këtë tweet të ‘sertë’!!! Më shumë kisha pasur dëshirë të mendoj se Twitteri i MPJ-së është hakuar se sa të lexoj si Kosova ia tregon vendin Putinit, Vuçiqit e besa e udhëzon Evropën se çfarë duhet të bëjë. Kosova në zgjidhje të problemeve globale me një anglishte të nivelit fillestar. Merrni more dikë që di anglisht së paku se horë po e bëni shtetin”, ka shkruar ajo në Facebook.

Ndaj MPJD ka reaguar edhe gazetari Enver Robelli.

“Postimi i sotëm i MPJ-së së Kosovës në Twitter lidhur me zhvillimet e fundit në Bjellorusi dhe rolin e Rusisë në Ballkan është joprofesional, jodiplomatik dhe joserioz. Postimi i para disa ditëve i MPJ-së në Twitter lidhur me konfliktin në Lindjen e Afërt ishte, po ashtu, joprofesional, i pabalancuar dhe e thjeshtësonte në mënyrë absurde një konflikt ku gjërat s’mund të shihen bardh e zi. MPJ urgjentisht duhet të arrijë nivel profesional të komunikimit me opinionin publik”, tha ai.

Tutje u shpreh se profili i MPJD-së në Twitter nuk është blog apo profil privat Facebooku, ku mund të shkruhet shkel e shko dhe me anglishte të dobët.

“Profili i MPJ-së në Twitter është, në fakt, pasqyrë e qëndrimeve të shtetit kosovar. Me postime si këto të fundit, Kosova shfaqet para botës me një pasqyrë të përlyer. Kësaj praktike duhet t’i jepet fund – menjëherë! Përgjegjësinë e bart jo vetëm MPJ, por tërë kabineti qeveritar, që duket si i përgjumur në komoditet votash”, ka shkruar ai.

Kritika ka pasur edhe në rrjetet sociale nga qytetarët. Komentet në këtë postim ishin të gjitha kritike.

“Zonja ministre, me gjithë respektin, shkruani më mirë në gjuhën gjermane, se sa në atë angleze me Google-Translate”.

“Fshijeni këtë postim më shpejtë se e pasket bo hajgare! Me anglisht nuk jeni kërkah”.

“Demantojeni, shkruajeni na e kanë vjedhur paswordin më mirë”, janë disa nga komentet në këtë post./Telegrafi.