Raste të reja infektimesh me COVID-19 në Ligën Premier

Klubet nga Liga Premier kanë regjistruar tetë raste të reja të infektimit me COVID-19 në pjesën e stafit teknik dhe lojtarëve në këtë javë.

Shifrat e fundit nga testet dy herë në javë zbuluan një rënie tjetër të numrit të rasteve, nga 16 që ishin një javë më parë.

Rezultatet bazohen në 2,518 teste të përfunduara midis të hënës 18 janar dhe të dielës 24 janar.

Rënia e numrit të testeve pozitive vjen pasi Liga Premier shtrëngoi protokollet e saj për coronavirus. Shkalla e infeksionit në flluskën e Ligës Premier tani ka rënë në 0.32%, krahasuar me 2.06% në popullsinë e gjerë dhe rreth 3% tek njerëzit e moshës 18 deri 35 vjeç.

Lojtarët ose stafi i klubit që kanë rezultuar pozitiv duhet të izolohen për një periudhë prej 10 ditësh.

Rezultatet e testimit shënojnë një hap tjetër përpara për Ligën Premier pasi vazhdon të sigurojë qeverinë angleze se futbolli mund të vazhdojë në mënyrë të sigurt dhe në përputhje me rregullat e COVID-19.

Ministrat u acaruan pas Vitit të Ri, kur doli që shtatë lojtarë të kalibrit të lartë nga pesë klube kishin qenë ose kishin organizuar ahengje gjatë periudhës festive.

Kjo u pasua shpejt nga festime të shumta në raundin e tretë të Kupës FA, me lojtarë që përqafoheshin pas golave ​​dhe festonin në dhomat e zhveshjes. /Telegrafi/