Punëtorët e KEK-ut të rrezikuar nga sulmet fizike

Dy punëtorë të KEK-ut, janë sulmuar gjatë kohës kur ata po bënin kontrollin e pikave matëse të konsumatorëve të mëdhenj në Vitomiricë të Pejës.

Korporata Energjetike e Kosovës (KEK), ka njoftuar se, janë sulmuar në detyrë dy punëtorë të kësaj korporate. Punëtorët e sulmuar janë Bekë Nikqi, Bashkim Zekaj, Gëzim Gashi dhe Zenun Shala. Ata janë sulmuar gjatë vizitës tek konsumatori me shifër 9030648 NTB Bibita në Vitomiricë të Pejës. Rasti kishte ndodhur, pasi që ekipi i KEK-ut po bënte kontrollin e pikave matëse të konsumatorëve të madhenj, me qëllim të luftimit të humbjeve komerciale, përkatësisht vjedhjeve të energjisë elektrike. Pasi kishin vizituar 13 konsumatorë, punëtorët i kishin lajmëruar punëtorit të sigurimit të kësaj kompanie se janë nga KEK-u dhe ai nuk e kishte lejuar matjen, përderisa edhe ekipi ishte kërcënuar. Punëtorët menjëherë kanë njoftuar për kërcënimin, për çka Policia e Kosovës, kishte shkuar në vendin e ngjarjes. Por, punëtorët janë sulmuar fizikisht, të gjithë në prezencë të organeve të rendit, ndërsa më keq kanë pësuar punëtorët e korporatës Gëzim Gashi dhe Zenun Shala. Më pas të gjithë punëtorët, për shkak të lëndimeve është dashur të shkojnë në Qendrën Emergjente të Spitalit të Pejës, për të kërkuar ndihmë mjekësore. Me rastin po merren organet e hetuesisë. KEK dënon ashpër këtë sulm ndaj punëtorëve në detyrë, duke shprehur indinjatën e thellë, tek organet e rendit pasi sulmi ka ndodhur në prani të policisë, duke kërkuar kështu nga organet e rëndit që përfaqësuesit e tyre, të jenë në nivel të detyrës, në mënyrë që të mos përsëritën më raste të tilla. Kek po ashtu apelon tek institucionet kompetente, që të ndërmarrin masa të rrepta ndaj sulmuesve, në mënyrë që të marrin dënimin e merituar. KEK shpreh përkrahjen e plotë për punëtorët të cilët kryejnë detyrat e tyre dhe do të mbrojë përformancën e tyre në rrugë ligjore. KEK është i vendosur në luftën kundër vjedhjeve dhe keqpërdorimeve tjera nga konsumatorë të pandërgjegjshëm dhe nuk do të ndalet deri në evidentimin dhe evitimin e keqpërdorimit të fundit.